استحکام پاکستان پارٹی کے چیئرمین جہانگیر ترین نے کہا ہے کہ ملک کو مشکلات سے نکالنے کیلئے ہی آئی پی پی وجود میں آئی ہے۔

تفصیلات کے مطابق جہانگیر ترین نے اپنے جاری کردہ ایک بیان میں کہا کہ حکومت کی مدت مکمل ہونے تک عون چوہدری اور نعمان لنگڑیال وفاقی وزیر اور بدستور وفاقی کابینہ کا حصہ رہیں گے۔

انہوں نے کہا کہ ملک کو مشکلات سے نکالنے کیلئے ہی آئی پی پی وجود میں آئی ہے، موجودہ حالات کے پیشِ نظر ملکی مفادات پارٹی مفادات سے زیادہ عزیز ہیں۔

ان کا کہنا تھا کہ ملک میں سیاسی استحکام کیلئے متحد ہونے کا پیغام دینا چاہتے ہیں، آئی ایم ایف سے معاہدہ ابھی زیرِ تکمیل ہے، اس وقت ملک کو استحکام کی اشد ضرورت ہے اور آئی ایم ایف ملک میں سیاسی و معاشی استحکام دیکھنا چاہتا ہے،   ان حالات میں وفاقی کابینہ سے علیحدگی اختیار کر کے منفی تاثر نہیں دینا چاہتے۔

جہانگیر خان ترین نے کہا کہ استحکام پاکستان پارٹی سیاسی استحکام پر یقین رکھنے والی ایک ذمہ دار پارٹی ہے، سیاسی استحکام، معاشی استحکام سے جڑا ہے، آنے والے انتخابات میں سیاسی فیصلے اس وقت کی صورت حال کے مطابق کریں گے، پارٹی سیاست کا محور و مرکز ملک میں سیاسی و معاشی استحکام لانا ہے۔

چیئرمین استحکام پاکستان پارٹی کا مزید کہنا تھا کہ آئی پی پی کا وجود پاکستان کی سلامتی کے ساتھ جڑا ہے، ملکی سلامتی اور استحکام سے بڑھ کر کچھ بھی نہیں، پہلی ترجیح مستحکم پاکستان ہے۔