عوامی مسلم لیگ کے سربراہ شیخ رشید نے کہا ہے کہ ملک میں اس قدر قیاس بے یقینی اور افواہوں کا زور ہے کہ آئین اور قانون کے تحت اسمبلیاں ٹوٹنے میں صرف چار ہفتے باقی ہیں۔

سماجی رابطے کی ویب سائٹ ٹوئٹر پر اپنے جاری کردہ بیان میں شیخ رشید نے کہا کہ لوگ سوچ رہے ہیں پاکستان میں الیکشن وقت پر ہونگے یا نہیں ہونگے اگر ہونگے تو اکتوبر میں ہونگے یا نومبر میں ہونگے یا نہیں ہونگے، الیکشن کمیشن کے فیصلے کا ساری قوم کو ابھی تک انتظار ہے۔

pic.twitter.com/L80zPJi55C

— Sheikh Rashid Ahmed (@ShkhRasheed) July 11, 2023

انہوں نے کہا کہ پندرہ مہنیوں میں حکومت نے کوئی ایسا کام نہیں کیا جو عوام میں جانے اور منہ دکھانے کی پوزیشن میں ہوں۔

سابق وفاقی وزیر نے کہا کہ ذرائع ابلاغ کو پابند سلاسل کرکے لوگوں کی سوچوں پر پہرے بٹھا دیے گئے ہیں، لیکن جو آدمی آٹا لینے جاتا ہے بجلی کا بل دیتا ہے بچوں کی فیس دیتا ہے گھر کا کرایہ دیتا ہے وہ حکومت سے بیزار ہے اور نفرت کا برملا اظہار کرتا ہے اور وقت کے انتظار میں ہے کہ  کب اُسے ووٹ کا حق ملے اور موجودہ حکومت سے نجات مل سکے۔

مزید پڑھیں: ہماری لڑائی ملٹری اسٹیبلشمنٹ سے نہیں ملک کاخزانہ لوٹنے والوں کیخلاف ہے،شیخ رشید

انکا کہنا ہے کہ عدلیہ کے فیصلوں کا مذاق اُڑ رہا ہے سیاسی ورکروں سے دہشتگردوں جیسا سلوک کیا جا رہا ہے، کسی کی عزت جان مال چادر چار دیواری محفوظ نہیں عقل کے اندھے لوگوں کے جذبات سمجھنے سے عاری ہیں۔

عوامی مسلم لیگ کے سربراہ نے کہا کہ یہ نہ ہو کہ لوگ سڑکوں پر پھٹ پڑیں اور کسی سے بھی سنبھالا نہ جائے ووٹ کو عزت دو کا نعرہ لگانے والوں نے ووٹر کو گلی محلے میں بے گناہ ذلیل اور رسوا کر دیا ہے۔

شیخ رشید نے مزید کہا کہ انہیں رات کے اندھیروں میں گھروں سے اٹھاتے ہیں اور عقوبت خانوں میں لے جاتے ہیں، نہ کوئی قانون ہے نہ شنوائی ہے صرف ایک پریس کانفرنس کا سوال ہے جس کے بعد رہائی ہے۔