شیخوپورہ سے پی ٹی آئی کے سابق ایم پی اے علی عباس گل آغا استحکام پاکستان پارٹی میں شامل ہو گئے ہیں۔

تفصیلات کے مطابق علی عباس گل آغا نے پارٹی صدرعبد العلیم خان سے پارٹی سیکرٹریٹ میں ملاقات کی ۔

دورانِ ملاقات عبد العلیم خان نےعلی عباس گل کے پارٹی میں شمولیت کے فیصلے کا خیر مقدم کیا ہے۔

اس موقع پرعبدالعلیم خان نے کہا کہ وطنِ عزیز کے مفاد کا بھرپور تحفظ استحکام پاکستان پارٹی کی اولین ترجیح ہے، ملک و قوم کے گزشتہ 5 برس ضائع ہوئے، 9 مئی تشدد کی علامت کا دن بن چکا۔

ان کا کہنا تھا کہ عام آدمی ملک میں نئی قیادت اور اسے ترقی و خوشحالی کی راہ پر گامزن دیکھنا چاہتا ہے، استحکام پاکستان پارٹی عوامی امنگوں کے عین مطابق منشور لائے گی، ہم دعوے نہیں عمل کر کے دکھائیں گے، تاخیر کا ازالہ کیا جائے گا، پارٹی کے دروازے کھلے ہیں، ہم ہر محبِ وطن کو ساتھ لے کر چلیں گے۔

انہوں نے مزید کہا کہ آئندہ دنوں میں ملک بھر سے اہم شخصیات پارٹی میں شامل ہوں گی، مہنگائی، بے روزگاری، امن و امان اور دہشتگردی جیسے مسائل حل کریں گے، آج بھی پختہ ارادے اور اہلِ قیادت کیساتھ بحرانوں سے نکل سکتے ہیں۔

علی عباس گل نے جہانگیر ترین اور عبد العلیم خان کی قیادت پر بھرپور اعتماد کا اظہار کیا ہے۔

انہوں نے کہا کہ استحکام پاکستان پارٹی موجودہ حالات میں واحد حل اور بہترین آپشن ہے۔

واضح رہے کہ اس موقع پر سابق صوبائی وزراء، پارٹی رہنما میاں خالد محمود اور سعید اکبر نوانی بھی موجود تھے۔