وزیر مملکت پیٹرولیم مصدق ملک نے عوام کو بڑی خوشخبری سنا دی ہے۔

تفصیلات کے مطابق وزیر مملکت پیٹرولیم مصدق ملک نے صحافیوں سے غیر رسمی گفتگو کرتے ہوئے کہا کہ پاکستان اور آذربائیجان کے درمیان ایل این جی کا تاریخی معاہدہ 24 تاریخ کو ہوگا۔

انہوں نے کہا کہ پاکستان، آذربائیجان سے ہر ماہ ایک اسپاٹ ایل این جی کارگو خریدے گا، حکومت آذربائیجان سے بارہ ایل این جی کارگو جہاز خریدے گی، سعودی عرب سے ریفائنری سیکٹر میں 14 ارب ڈالر سرمایہ کاری کا معاہدہ حکومت جانے سے قبل ہوگا۔

ان کا کہنا تھا کہ فرٹیلائزر سیکٹر کو سستی گیس دینے کی ہمیشہ مخالفت کی ہے، فرٹیلائزر سیکٹر کی سبسڈی ختم کرکے کسان کو ملنی چاہیئے، فارمولا کابینہ میں پیش کرچکا ہوں۔

مصدق ملک نے کہا کہ ملک میں سب سے ذیادہ 1500 ایم ایم سی ایف ڈی گیس فرٹیلائزر کھا جاتے ہیں، فرٹیلائزر سیکٹرز کے سستی گیس کے معاہدوں کی میعاد ختم ہورہی ہے۔

 مصدق ملک نے فرٹیلائزرز کو گیس فراہم کرنے کے نئے معاہدے نئی شرائط پر ہونے کا بھی اشارہ دے دیا۔

انہوں نے کہا کہ صنعتوں کو سستی ایل این جی فراہم کرنے کی نئی پالیسی متعارف کرارہے ہیں، سستی ایل این جی فراہم کرنے کیلئے صنعتکاروں سے ملاقات کا شیڈول طے پا گیا ہے، ملک میں پیڑول اور ڈیزل کی بڑے پیمانے پر اسمگلنگ جاری ہے۔

  وزیر مملکت پیٹرولیم مصدق ملک نے اس بات کا انکشاف کیا کہ پاکستان کو اسمگلنگ سے 120 ارب روپے کا نقصان ہورہا ہے۔