وزیرِ اعظم محمد شہباز شریف نے کہا ہے کہ پاکستان کی معاشی ترقی آبادی کے مابین مساوات کے بغیر ممکن نہیں۔

وزیرِ اعظم نے آبادی کے عالمی دن کے موقع پر پیغام دیتے ہوئے کہا کہ آج پوری دنیا میں آبادی کا عالمی دن منایا جا رہا ہے، آج کے دن ہمیں دنیا کہ بڑھتی ہوئی آبادی، اسکے لئے موجود محدود وسائل اور اسے با اختیار بنانے کیلئے پالیسی اقدامات پر خصوصی توجہ مرکوز کرنے کی ضرورت ہے۔

انہوں نے کہا کہ قومی سطح پر منصوبہ بندی میں آبادی کلیدی حیثیت رکھتی ہے، کوئی بھی ترقی پزیر ملک آبادی اور وسائل کے توازن کے بغیر اپنے ترقی کے اہداف پورے نہیں کر سکتا، کوئی بھی ملک چاہے کتنا بھی وسائل سے مالامال کیوں نہ ہو، آبادی میں اچانک اضافہ اسکے لئے مسائل پیدا کر سکتا ہے۔

شہباز شریف نے کہا کہ اس سال آبادی کے عالمی دن کا موضوع “صنفی مساوات کی طاقت  کو بروئے کار لانا” ہے، آئیں اس دن ہم سب مل کر اپنے ملک کی خواتین اور مردوں کے مابین مساوات سے انکی صلاحیتوں کے بھرپور استعمال سے ملکی ترقی کے اہداف پورے کرنے کیلئے اقدامات کریں۔

انکا کہنا ہے کہ پاکستان کی باصلاحیت خواتین کی قومی دہارے میں شمولیت ہمیں ملکی ترقی اور افرادی قوت کی استعداد بڑھانے کے اہداف کے حصول میں بھی مدد دے گی۔

وزیرِ اعظم نے کہا کہ صنفی مساوات صرف انسانی حقوق کا مسئلہ نہیں بلکہ یہ معاشی ضرورت بھی ہے، پاکستان کی معاشی ترقی آبادی کے مابین مساوات کے بغیر ممکن نہیں۔

انہوں نے کہا کہ موسمیاتی تبدیلی، بین الاقوامی سطح پر تنازعات اور کساد بازاری کی وجہ سے تقریباً تمام ممالک پائیدار ترقی کے اہداف ایس ڈی جی ایس کے حصول میں مشکلات سے دوچار ہیں۔ صنفی عدم مساوات کی وجہ سے پائیدار ترقی کے اہداف کا حصول اور بھی مشکل ہوجاتا ہے۔

شہباز شریف نے کہا کہ آبادی کے عالمی دن کے موقع پر میں تمام اسٹیک ہولڈرز سے التماس کرونگا کہ وہ لوگوں کو تعلیم اور صحت کی بہترین سہولیات کی فراہمی سے انکی استعداد میں اضافہ کریں۔

وزیرِ اعظم نے مزید کہا کہ میری نظر میں ترقی کا صحیح نظریہ لوگوں کی فلاح پر مبنی ہے، ہمیں اس حوالے سے لوگوں اور پالیسی سازوں کے مابین روابط کو بڑھانا ہوگا۔