ترجمان استحکام پاکستان پارٹی فیاض الحسن چوہان نے کہا ہے کہ پارٹی الیکشن کے نام پر اوورسیز پاکستانیوں سے کروڑوں روپے لیے گئے۔

تفصیلات کے مطابق حامد خان ایڈووکیٹ کی طرف سے جہانگیر ترین اور علیم خان پر الزامات پر پارٹی فیاض الحسن چوہان نے ردِ عمل دیتے ہوئے کہا کہ 2011ء میں پی ٹی آئی کے انٹرا پارٹی الیکشن تاریخ کے سب سے زیادہ دھاندلی زدہ الیکشن تھے، عمران خان کی سرپرستی میں یہ دھاندلی زدہ الیکشن کروائے گئے، اُس دھاندلی زدہ الیکشن کا مقصد مرکز سے لے کر یوسیز لیول تک اپنی مرضی کے عہدِداران بنانا تھا۔

فیاض الحسن چوہان نے کہا کہ پارٹی الیکشن کے نام پر اوورسیز پاکستانیوں سے کروڑوں روپے لیے گئے، اوورسیز پاکستانیوں کا کروڑوں روپیہ پارٹی الیکشن کے نام پر کرپشن کے نذر کر دیا گیا، پارٹی میں زبان زدِ عام تھا کہ الیکشن کا سافٹ ویئر صدر عارف علوی کے بیٹے کی کمپنی نے بنایا تھا۔

ان کا کہنا تھا کہ بدنامِ زمانہ انٹرا پارٹی الیکشن کی ذمہ داری حامد خان اپنے منہ سے تسلیم کر رہے ہیں، پی ٹی آئی کی تباہی کی بنیاد 2011ء میں حامد خان اور اُن کے گینگ نے انٹرا پارٹی الیکشن کے ذریعے ڈالی، حامد خان روزِاول سے جہانگیر ترین کی پارٹی کے لیے مالی اور سیاسی قربانیوں کی وجہ سے ذاتی بغض اور کینہ رکھتے تھے۔

فیاض چوہان نے مزید کہا کہ حامد خان پی ٹی آئی کے عام کارکنان اور سیاسی رہنماؤں میں قدر کی نگاہ سے نہیں دیکھے جاتے تھے، حامد خان جہانگیر ترین اور علیم خان پر تنقید کر کے اپنا سیاسی قد بڑھانے کی ناکام کوشش مت کریں۔