نیپرا نے سرکاری ڈسکوز کیلئے بجلی 1 روپے 90 پیسے جبکہ کراچی والوں کیلئے 1 روپے 44 پیسے فی یونٹ مہنگی کرنے کی منظوری دے دی۔

تفصیلات کے مطابق نیپرا نے سی پی پی اے اور کے الیکٹرک کی درخواستوں پر سماعت مکمل کر کے سرکاری ڈسکوز کیلئے بجلی 1 روپے 90 پیسے جبکہ کراچی والوں کیلئے 1 روپے 44 پیسے فی یونٹ مہنگی کرنے کی منظوری دے دی۔

چیئرمین نیپرا توصیف ایچ فاروقی کی صدارت میں ماہ مئی کے ماہانہ فیول پرائس ایڈجسٹمنٹ کی مد میں اضافے کی درخواستوں پر الگ الگ سماعت ہوئی جس میں سینٹرل پرچیزنگ پاور ایجنسی کی سرکاری ڈسکوز کے صارفین کیلئے 2 روپے 5 پیسے اضافے کی درخواست کے برعکس 1 روپے 90 پیسے جبکہ کے الیکٹرک کی 1 روپے 49 پیسے اضافے کی درخواست کے برعکس 1 روپے 44 پیسے اضافے کی منظوری دی گئی۔

ماہ مئی کیلئے سرکاری ڈسکوز کے صارفین پر تئیس ارب جبکہ کراچی والوں کیلئے دو ارب سے زائد کا اضافی بوجھ پڑے گا۔

دوران سماعت اتھارٹی نے این ٹی ڈی سی ڈسکوز اور کے الیکٹرک کی کارکردگی پر بھی شدید تحفظات کا اظہار کیا۔

چیئرمین نیپرا نے ریمارکس دیے کہ چاہنے کے باوجود صارفین کو سستی بجلی فراہم نہیں کر پا رہے ہیں، روپے کی بے قدری اور مہنگا فرنس آئل صارفین کیلئے عذاب بن گیا ہے۔

نیپرا اتھارٹی کی جانب سے کے الیکٹرک اور سی پی پی اے کی درخواستوں پر تفصیلی فیصلہ بعد میں جاری کیا جائے گا۔