وزیر اطلاعات سندھ شرجیل انعام میمن نے سکھر اور نوابشاہ میں بھی اکنامک زون قائم کرنے کا اعلان کردیا۔

شرجیل انعام میمن نے کراچی میں میڈیا سے گفتگو کرتے ہوئے کہا کہ پیپلزپارٹی نے ہمیشہ قومی مفاد کا پیغام دیا، دشمن ممالک چاہتے ہیں پاکستان میں بدامنی رہے، دنیا بھر کے سرمایہ کاروں کو پاکستان آنے کی دعوت دیں گے۔

انہوں نے کہا کہ وزیراعلیٰ سندھ کی سربراہی میں سندھ حکومت ہرشعبے میں فعال ہے، کوئلے اور ونڈرپاور میں سندھ حکومت نے کامیاب ماڈل پیش کیے۔

وزیر اطلاعات سندھ نے کہا کہ نوجوانوں کے لیے ہر شعبے میں روزگار کے مواقع پیدا کرنے ہیں۔ ای وی بسوں کا پلانٹ کراچی میں لگنے جارہا ہے، ایک پڑوسی ملک سے اس سلسلے میں بات چل رہی ہے۔

انکا کہنا ہے کہ دھابیجی اکنامک زون کا آغاز 15 جولائی سے کیا جارہا ہے، دھابیجی اکنامک زون سے سرمایہ کاری میں اضافہ ہوگا۔

شرجیل انعام میمن نے کہا کہ غیرملکی سرمایہ کاری بھی دھابیجی اکنامک زون میں سرمایہ کاری کررہے ہیں، سرمایہ کاری ہوگی تو لوگوں کو روزگار ملے گا۔

صوبائی وزیر نے کہا کہ صحت کے شعبے میں سندھ پورے پاکستان میں نمبر ون ہے، پورے پاکستان سے علاج کے لیے لوگ سندھ آتے ہیں۔

انکا کہنا ہے کہ سندھ کے سرکاری اسپتالوں میں علاج کے لیے صحت کارڈ کی ضرورت نہیں، سندھ حکومت نے سندھ بھرمیں میگا پروجیکٹ شروع کیے، ہمارا مقصد لوگوں کی زندگیاں آسان بنانا ہے۔

وزیر اطلاعات سندھ نے کہا کہ شارع فیصل کی طرح شہر بھر میں بس اسٹاپ بنائے جائیں گے، کل مزید بسیں کراچی پہنچ جائیں گی، نئی بسیں کراچی سمیت سندھ کے دیگر اضلاع میں چلائی جائیں گی۔

شرجیل انعام میمن نے مزید کہا کہ الیکٹرک بسوں کے نئے چارجر آگئے ہیں، کراچی پہلا شہر ہے جہاں الیکٹرک بسیں چل رہی ہیں، ترجیح ہے کراچی کے شہریوں کو سستی بس سروس میسر ہو۔