مسلم لیگ ق کے رہنما چوہدری شافع حسین نے کہا ہے کہ چوہدری پرویز الٰہی تحریک انصاف چھوڑ کر ق لیگ میں واپس آنے پر راضی ہیں مگر مونس الٰہی تیار نہیں ہیں۔

تفصیلات کے مطابق چوہدری شافع حسین نے اپنے جاری کردہ ایک بیان میں کہا کہ چوہدری شجاعت، پرویز الٰہی سے جیل میں تین ملاقاتیں کر چکے ہیں، تیسری ملاقات میں کافی چیزیں تبدیل ہو گئیں۔ پرویز الٰہی تحریک انصاف چھوڑنے پرراضی ہیں مگر مونس الٰہی تیار نہیں ہیں۔

اس سے قبل لاہور میں چوہدری سرور اور چوہدری شافع نے پریس کانفرنس کرتے ہوئے کہا کہ الیکشن کا وقت قریب آ رہا ہے، پنجاب میں اپنے امیدواروں سے رابطے اور ملاقاتیں جاری ہیں، ہمارے امیدوار عوامی مقبولیت کے ساتھ ایماندار اور صاف لوگ ہیں۔

انہوں نے کہا کہ وزیر اعظم کا زراعت کی بحالی کا پروگرام انتہائی شاندار ہے، رہائشی کالونیاں زرعی زمین کی بجائے بنجر زمین پر بننی چاہئیں، زراعت کے حوالے سے ہماری جماعت کا بھی واضح موقف ہے۔

ان کا کہنا تھا کہ گندم اور دیگر فصلوں کے بیجوں پر تحقیقات کا کام پنجاب میں رکا ہوا ہے، بھارت اس معاملے میں ہمارے سے کہیں زیادہ آگے ہے۔

چوہدری شافع حسین نے مزید کہا کہ آئی ایم ایف سے ایک قسط ابھی ملنے جا رہی ہے، آئی ایم ایف پاکستان کے مسائل کا حل نہیں ہے تاہم حکومتی اقدامات سے مہنگائی میں کمی ہو گی۔