سابق وزیراعلیٰ پنجاب حمزہ شہباز نے کہا ہے کہ جھوٹے مقدمات بنانے والا آج توشہ خانہ کا حساب نہیں دے سکتا۔

تفصیلات کے مطابق سابق وزیراعلیٰ پنجاب حمزہ شہباز نے اندرون بھاٹی گیٹ میں میڈیا سے گفتگو کرتے ہوئے کہا کہ قوم نے مشکل ترین حالات دیکھے، آئی ایم ایف کے معاہدے کو عمران خان نے سبوتاژ کیا، قوم کی کامیابی ہے کہ دوبارہ سے آئی ایم ایف سے معاہدہ ہو گیا ہے جو اچھی امید لے کر آئے گا۔

انہوں نے کہا کہ قومی انتخابات ہونے تو ہیں لیکن پاکستانیت کا تقاضا ہے کہ تمام سیاسی جماعتیں مل بیٹھ کر معیشت کے حوالے سے نیا عمرانی معاہدہ کریں جسے آئینی تحفظ حاصل ہو، اب پاکستان کی بقا کی جنگ ہے۔

ان کا کہنا تھا کہ پی ٹی آئی کے سابقہ دور میں یہاں بغیر اجازت سے اندھا دھند عمارتیں بنانے دی گئیں جس کی انکوائری کی جائے گی، شہزاد اکبر کہاں گیا جو دس دس گھنٹے کی پریس کانفرنسز کرتا تھا۔

ان کا یہ بھی کہنا تھا کہ جھوٹے مقدمات بنانے والا آج توشہ خانہ کا حساب نہیں دے سکتا، میری اور شہباز شریف کی بریت عمران خان کے دور میں ہوئی کیونکہ ان کیسز میں کوئی ثبوت نہیں تھا، ہم بریت پر اللہ کا شکر ادا کرتے ہیں جبکہ عمران خان کرپشن میں ڈوبا ہوا ہے

سابق وزیراعلیٰ پنجاب حمزہ شہباز نے مزید کہا کہ عمران خان نے معیشت سازش کی، مہنگائی عوام کا سب سے دیرینہ مسئلہ ہے، مہنگائی سے کوئی آنکھیں نہیں چرا سکتا لیکن ہماری محنت سے معیشت سنبھلے گی تو عوام کو بھی ریلیف ملے گا۔