وزیر اعظم شہباز شریف کی بل اینڈ ملینڈا گیٹس فاﺅنڈیشن کے شریک چیئرمین بل گیٹس سے صحت عامہ اور سیکٹر پروگرامز سے متعلق ٹیلیفونک گفتگو ہوئی ہے۔

دوران گفتگو  وزیر اعظم نے بل اینڈ ملینڈا گیٹس فاﺅنڈیشن کی پاکستان میں خدمات کو سراہا اور کہا کہ پولیو کا خاتمہ، مہلک بیماریوں سے بچوں کو بچانا، غذایت کی کمی کے مسائل پر قابو پانا حکومت کی اولین ترجیح ہے۔

وسائل میں سب کی شمولیت کے لئے موجودہ حکومت خصوصی توجہ دے رہی ہے، بل اینڈ ملینڈا گیٹس فائڈیشن کے ساتھ مل کر جاری تعاون کو مزید بہتر اور نتیجہ خیز بنانا چاہتے ہیں۔

ٹیلیفونک گفتگو کے دوران بل گیٹ نے وزیراعظم شہباز شریف کی لیڈرشپ اور پولیو کے خاتمے کے لئے پاکستان کی کوششوں کو سراہا اور کہا کہ پولیو وائرس سے بچوں کو معذور ہونے سے بچانے کے لئے پاکستان کی بھرپور مدد جاری رکھیں گے۔

وزیر اعظم اور بل گیٹ نے غذایت کی کمی، اسٹنٹڈ گروتھ، بیماریوں سے بچاﺅ کی لازمی خدمات کی فراہمی سے متعلق بھی گفتگو کی اور قریبی تعاون اور اشتراک عمل سے کام جاری رکھنے پر اتفاق کیا۔

وزیر اعظم اور بل گیٹ کی گفتگو میں مائیکرو پے منٹ گیٹ وے راست اور قومی بچت پروگرام کو ڈیجیٹل کرنے سے متعلق امور بھی زیرغور آئے۔

واضح رہے کہ بل اینڈ ملینڈا گیٹس فاﺅنڈیشن پاکستان میں صحت عامہ اور دیگر سماجی بہبود کے پروگرامز چلا رہی ہے۔