امریکی وزیرخارجہ انٹونی بلنکن نے وزیر خارجہ بلاول بھٹو زرداری سے ٹیلیفونک رابطہ کیا ہے۔ گفتگو کے دوران دو طرفہ تعلقات اور علاقائی صورتحال پر تبادلہ خیال کیا گیا۔

تفصیلات کے مطابق امریکی وزیر خارجہ انٹونی بلنکن اور وزیر خارجہ بلاول بھٹو زرداری نے ایک اہم ٹیلی فونک گفتگو میں پاکستان کے اقتصادی نقطہ نظر اور افغانستان میں جاری پیش رفت سے متعلق امور پر تبادلہ خیال کیا۔

وزیرخارجہ بلاول بھٹو زرداری نے آئی ایم ایف کے اسٹینڈ بائی ارینجمنٹ معاہدے پر امریکا کی حمایت پر شکریہ ادا کرتے ہوئے کہا کہ یہ ارینجمنٹ پاکستان کی اقتصادی اور ترقیاتی ضروریات کو تقویت فراہم کرے گا۔

بلاول بھٹو زرداری نے مزید کہا کہ پاکستان اپنی معیشت میں اسٹرکچرل اصلاحات لانے کےلیے پرعزم ہے، معیشت کو کاروبار اور غیرملکی سرمایہ کاری کےلیے مسابقتی اور پرکشش بنائیں گے۔

ترجمان کے مطابق بات چیت کے دوران دونوں وزرائے خارجہ نے خطے میں امن، سلامتی اور ترقی کے فروغ کےلیے روابط کی اہمیت پرزور دیا۔

ترجمان امریکی دفتر خارجہ کے مطابق دونوں ممالک کے وزرائے خارجہ نے روس کی یوکرین کے خلاف جنگ کے اثرات سمیت پرامن اور مستحکم افغانستان پر تبادلہ خیال کیا۔

گفتگو کے دوران انٹونی بلنکن نے پاکستان کی اقتصادی کامیابی اور بہبود کے لیے امریکہ کے عزم کا اعادہ کیا اور اس بات پر زور دیا کہ یہ اولین ترجیح ہے۔

انٹونی بلنکن نے تکنیکی اور ترقیاتی اقدامات کے تسلسل کے ساتھ ساتھ دونوں ممالک کے درمیان مضبوط تجارتی اور سرمایہ کاری کے تعلقات کو ان کے تعاون کے اہم پہلوؤں کے طور پر اجاگر کیا۔

امریکی وزیرخارجہ نے آئی ایم ایف کی جانب سے پاکستان کے لیے حالیہ پروگرام کی منظوری کا خیرمقدم کیا اور ملک کی بحالی اور خوشحالی کے لیے اقتصادی اصلاحات کی اہمیت کو تسلیم کیا۔

انٹونی بلنکن نے پاکستان کو معاشی ترقی اور استحکام کے فروغ میں امریکہ کی مسلسل شمولیت اور حمایت کا یقین دلایا۔