صدر مملکت نے کہا ہے کہ کاروباری اور صنعتی شعبوں میں خصوصی افراد کی نمائندگی بڑھائی جائے۔

تفصیلات کے مطابق صدر مملکت ڈاکٹر عارف علوی کی زیرِ صدارت معذوری کی درجہ بندی کے فریم ورک پر اجلاس ہوا جس میں میں وزارت ِ انسانی حقوق، قومی صحت، نادرا اور نیوٹک کے اعلیٰ حکام نے شرکت کی۔

اجلاس کی صدارت کرتے ہوئے صدر مملکت ڈاکٹر عارف علوی نے کہا کہ منفرد صلاحیتوں کے حامل افراد کو سرکاری اور نجی شعبوں میں نوکریاں دینے کی ضرورت ہے اور خصوصی افراد کو نوکریاں دلانے کی کوششیں بھی تیز کرنا ہوں گی۔

انہوں نے کہا کہ نوکریوں کیلئے خصوصی افراد کی موزونیت کا تعین عالمی معیارکے مطابق ہونا چاہیے جبکہ نوکریوں کی تلاش میں خصوصی افراد کو  معاونت فراہم کی جانی چاہیے۔

صدر مملکت  کا کہنا تھا کہ کاروباری اور صنعتی شعبوں میں خصوصی افراد کی نمائندگی بڑھائی جائے جبکہ ہنر مند افرادِ باہم معذوری کی ملازمت کیلئے ممکنہ آجروں کی نشاندہی کی جائے، خصوصی افراد کی نوکریوں کیلئے نجی شعبے کے بڑے آجروں سے رابطہ کیا جانا چاہیے۔

ڈاکٹر عارف علوی نے قومی اور صوبائی سطح پر عالمی معیارکے مطابق تیار کردہ معذوری  کی درجہ بندی کانظام اپنانے کی ضرورت پر زور دیتے ہوئے کہا کہ فریم ورک معذوری کی درجہ بندی اور ملازمتوں کیلئے موزونیت کا تعین کرنے میں مدد کرے گا۔

انہوں نے عام لوگوں کیلئے معذوری سرٹیفکیٹ کا اردو ترجمہ کرنے کی  ضرورت پر زور دیتے ہوئے کہا کہ متعلقہ اسٹیک ہولڈرز ملک میں یکساں درجہ بندی کے نظام اور معذوری سرٹیفکیٹ اپنانے کیلئے صوبوں کے ساتھ ہم آہنگی بہتر بنائیں۔

صدر مملکت ڈاکٹر عارف علوی نے مزید کہا کہ میڈیا میں خصوصی افراد کی کامیابیوں کو اجاگر کرنے کی ضرورت ہے ، انسانی حقوق کی وزارت سرکاری اور نجی شعبوں میں خصوسی افراد کی ملازمتوں کیلئے کوششیں مزید تیز کرے۔