وفاقی وزیر برائے انفارمیشن ٹیکنالوجی سید امین الحق نے کہا ہے کہ نوجوانوں کی مہارتوں کو فروغ دینے کے لیے ملک بھر میں مفت آئی ٹی کورسز شروع کیے گئے ہیں۔

تفصیلات کے مطابق وفاقی وزارت آئی ٹی کے ادارے اگنائٹ کے تحت راشد منہاس بوئز اینڈ گرلز سیکنڈری و پرائمری اسکول ناظم آباد نمبر 1 میں ڈیجیٹل آئی ٹی لیب کا افتتاح کیا گیا۔

آئی ٹی لیب کا افتتاح سربراہ متحدہ ڈاکٹر خالد مقبول صدیقی اور وفاقی وزیر آئی ٹی سید امین الحق نے کیا۔

اس موقع پر امین الحق نے آئی ٹی لیب کی افتتاحی تقریب سے خطاب کرتے ہوئے کہا کہ ڈیجیٹل آئی ٹی لیب میں کمپیوٹر، تیز ترین انٹرنیٹ سمیت تمام سہولیات فراہم کی گئی ہیں، لیب میں فری لانسنگ، گرافک ڈیزائننگ، ڈیجیٹل مارکیٹنگ سمیت 15 اہم کورسز کی مفت تربیت فراہم کی جائے گی۔

وفاقی وزیر نے کہا کہ طلبہ و طالبات لاکھوں روپے کے مہنگے کورسز کی تربیت بالکل مفت حاصل کرسکیں گے، چاہتے ہیں کہ غریب و مڈل کلاس فیملی کے  بچوں کو بھی یکساں مواقع فراہم ہوں۔

امین الحق نے کہا کہ کورسز کی تکمیل طلبہ طالبات کو سیکنڈری سطح پر ہی بہترین ہنرمند بنادے گی، یہی بچے آگے چل آئی ٹی کے میدان میں کامیابیوں کی نئی تاریخ رقم کرتے ہوئے ملکی معیشت کے استحکام میں معاون ہوں گے۔

انہوں نے کہا کہ پاکستان کو ڈیجیٹل دنیا سے منسلک کرنے کیلئے آئی ٹی کورسز و تعلیم پرائمری سطح سے دی جانی ضروری ہے۔

سید امین الحق نے نوجوانوں پر زور دیا ہے کہ وہ خود کو آئی ٹی کی مہارتوں سے آراستہ کریں، آن لائن کاروبار شروع کریں اور ڈیجیٹل ٹیکنالوجی کا استعمال کرکے پیسہ کمائیں۔

اس موقع پر کنوینر ایم کیو ایم خالد مقبول صدیقی نے کہا کہ پچاس سال قبل تعلیم کا راستہ بند کرنے کے لیے صوبے میں کوٹہ سسٹم لگایا گیا تھا اب سیاست تعلیم کی راہ میں رکاوٹ نہیں بنے گی آئندہ آنے والے پانچ سال اس شہر کے لیے بہتر ثابت ہونگے۔

واضح رہے کہ تقریب میں رکن سندھ اسمبلی عباس جعفری، چیف ایگزیکٹو اگنائٹ عاصم شہریار ایم کیو ایم پاکستان رابطہ کمیٹی کے اراکین سمیت دیگر اہم شخصیات نے شرکت کی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں