آرمی چیف جنرل سید عاصم منیر نے کہا ہے کہ پاکستان کو موجودہ بحران سے نکال کر دم لیں گے۔

پاک فوج کے شعبہ تعلقات عامہ (آئی ایس پی آر) کے مطابق خانیوال ماڈل ایگریکلچر فارم کی افتتاحی تقریب کے موقع پر پاک فوج کے سپہ سالار جنرل سید عاصم منیر نے تقریب سے خطاب کرتے ہوئے کہا کہ فوج عوام سے ہے اور عوام فوج سے ہے، پاکستانی غیرت مند، غیور اور باصلاحیت قوم ہے، پاک فوج کو اپنی قوم کی خدمت کرنے پر فخر ہے۔

 انہوں نے کہا کہ ہم نے فیصلہ کیا ہے کہ پاکستان کو موجودہ بحران سے نکال کر دم لیا جائے گا، تمام پاکستانیوں نے بھکاری کا کشکول باہر اُٹھا کر پھینکنا ہے۔

آرمی چیف جنرل سید عاصم منیر نے کہا کہ اللہ تعالٰی نے پاکستان کو تمام نعمتوں سے نوازا ہے، ہمیں دنیا کی کوئی طاقت ترقی کرنے سے نہیں روک سکتی۔

انہوں نے کہا کہ ہم اس ماڈل فارم کی طرز کے جدید فارم بنائیں گے جس سے چھوٹے کسان کو فائدہ ہوگا اور گرین انیشیٹووکا یہ دائرہ کار پورے پاکستان میں پھیلایا جائے گا، پاکستان میں زرعی انقلاب آکر رہے گا۔ انشاءاللہ

چیف آف آرمی اسٹاف جنرل سید عاصم منیر نے مزید کہا کہ ریاست ماں کی طرح ہوتی ہے، عوام اور ریاست کا رشتہ محبت اور احترام کا ہے، سیکیورٹی اور معیشت کا چولی دامن کا ساتھ ہے، سیکیورٹی کے بغیر معیشت اور معیشت کے بغیر سیکیورٹی نا گزیر ہے۔

آرمی چیف نے شرکاءِ تقریب کو مخاطب کرتے ہوئے علامہ اقبال کا شعر  پڑھ کر ملک و ملت کے ہر فرد کی ملکی ترقی میں اہمیت پر زور دیا۔

آرمی چیف نے علامہ اقبال کا شعر پڑھا کہ:  

افراد کے ہاتھوں میں ہے اقوام کی تقدیر

ہر فرد ہے ملت کے مقدر کا ستارہ