لاہور سمیت دیگر شہروں میں تیز آندھی کے ساتھ بارش کا سلسلہ جاری ہے۔

تفصیلات کے مطابق کمشنر لاہور محمد علی رندھاوا نے اپنے ایک بیان میں کہا کہ لاہور میں ابھی تک سب سے زیادہ بارش نشتر ٹاؤن میں 180 ملی میٹر جبکہ لکشمی چوک میں 178 ایم ایم ریکارڈ کی گئی ہے، قربہ چوک میں 177 ایم ایم بارش ریکارڈ کی گئی ہے۔

کمشنر لاہور نے کہا کہ واسا افسران اور اہلکار فیلڈ میں موجود ہیں، تمام اے سیز، ایم سی ایل اور ایل ڈی اے افسران فوری طور پر فیلڈ وزٹ کریں، نکاسیئ آب کیلئے تمام انتظامی محکمے مل کر کام کریں اور نشیبی علاقوں کو کلیئر کرائیں۔

ان کا کہنا تھا کہ تمام انڈرپاسز سے بارشی پانی کا نکاس فوری ہونا چاہیے، شہر کے نشیبی علاقوں میں نکاسئی آب مشینری اور افرادی وسائل پلاننگ کے مطابق ہونے چاہیے، زیادہ پانی جمع ہونے کی اطلاع واسا کنٹرول کو دی جائے۔

لیسکو فیلڈ اسٹاف کو ہائی الرٹ کر دیا گیا

ترجمان لیسکو نے اپنے جاری کردہ بیان میں کہا کہ بارش کے باعث لیسکو کے 110 فیڈرز سے بجلی کی سپلائی عارضی طور پرمعطل ہوئی ہے، فیلڈ اسٹاف کو ہائی الرٹ کر دیا گیا ہے تاہم شدید بارش کے باعث بجلی بحالی  کے کاموں میں مشکلات کا سامنا کرنا پڑ رہا ہے، بارش کے رکتے ہی بجلی بحالی کا کام شروع کر دیا جائے گا۔

ترجمان لیسکو کا کہنا ہے کہ موسم کی خرابی کے پیش نظر لیسکو انتظامیہ کی معزز صارفین سے تعاون کی اپیل ہے، صارفین سے درخواست ہے کہ بارش کے دوران بجلی کی تنصیبات سے دور رہیں، بجلی کی ہائی ولٹیج تاروں ٹرانسفارمر کے نیچے غیر قانونی تعمیرات اور اسٹال یا ٹھیلہ لگانے سے گریز کریں۔

ان کا کہنا ہے کہ اپنے بچوں کو خصوصی تاکید کریں کہ وہ گلی محلوں میں کھیلتے ہوئے بجلی کی تنصیبات سے دور رہیں، بجلی کی ہائی ٹینشن لائنوں سے کم از کم 10 فٹ دور رہیں، بجلی معطل ہونے کی صورت میں لیسکو کو مطلع کر کے عملے کے آنے کا انتظار کریں۔

نگران وزیر اعلیٰ پنجاب نے نکاسی آب کیلئے ہدایات جاری کر دیں

نگران وزیراعلیٰ پنجاب محسن نقوی نے نکاسی آب کے لیے ہدایات جاری کرتے ہوئے صوبائی انتظامیہ، پی ڈی ایم اے، ریسکیو 1122 اور واسا کو الرٹ کر دیا ہے۔

محسن نقوی نے ہدایت دیتے ہوئے کہا ہے کہ متعلقہ افسران  فیلڈ میں نکلیں اور نکاسی آب کے کام کی خود نگرانی کریں، نشیبی علاقوں اور شاہراوں سے ترجیحی بنیادوں پر نکاسی آب کو یقینی بنایا جائے، ضروری مشینری کے ذریعے نکاسی آب کا کام متعین وقت میں مکمل کیا جائے، نکاس آب کے کام میں کوتاہی قطعا قابل قبول نہیں، ٹریفک رواں دواں رکھنے کے لیے موثر مینجمنٹ کی جائے۔

نگران وزیر اعلیٰ پنجاب کا کہنا ہے کہ بارش کے باعث اب تک 6 افرادجاں بحق ہوئے جن میں سے 3 افراد کرنٹ لگنے، 2 چھت گرنے اور بچی ڈوب کر جاں بحق ہوئی۔

ان کا کہنا تھا کہ رات 9 بجے ایک اور اسپیل آنا ہے، کوشش ہے اگلے اسپیل سے پہلے پانی نکال دیں، اب تک لاہور میں 291 ملی میٹر بارش ریکارڈ ہوئی ہے، غازی ٹاؤن اور مسلم ٹاؤن میں بہت زیادہ پانی جمع ہوا ہے، ہمارا ٹارگٹ ہے لوگوں کو فوری ریلیف دے سکیں۔