بھارت کی جانب سے دریائے چناب میں چھوڑا گیا سیلابی ریلا پاکستانی حدود میں داخل ہو گیا ہے۔

فلڈ کنٹرول روم کے مطابق چناب ہیڈ مرالہ کے مقام پر پانی کا بہاؤ 122184 کیوسک ہو گیا ہے جبکہ دریائے چناب میں ہفتے کی صبح پانی کا بھاؤ 60 ہزار کیوسک تھا۔

دریائے چناب میں پانی کے بہاؤ میں مسلسل اضافہ ہو رہا ہے تاہم بھارت سے دریائے چناب میں بڑا سیلابی ریلا اتوار کو سیالکوٹ پہنچے گا۔

فلڈ کنٹرول روم کا کہنا ہے کہ دریائے چناب میں انتہائی اونچے درجے کے سیلاب کا خدشہ ہے جبکہ فلڈ فور کاسٹنگ ڈویژن نے پہلے ہی فلڈ وارننگ جاری کردی تھی۔

محکمہ موسمیات کی پیش گوئی

دوسری جانب محکمہ موسمیات کا کہنا ہے کہ دریائے چناب میں شدید سیلابی کیفیت پیدا ہونے کا امکان ہے، آج سے 10 جولائی تک دریا میں انتہائی اونچے درجے کا سیلابی ریلا آسکتا ہے۔

محکمہ موسمیات کے مطابق بھارت کی طرف سے پانی چھوڑے جانے کی صورت میں سیلابی ریلا مزید شدت اختیار کرسکتا ہے۔

ڈی جی پی ڈی ایم اے

اس حوالے سے ڈائریکٹر جنرل (ڈی جی) پی ڈی ایم اے نے کہا ہے کہ پنجاب کے مختلف شہروں میں مزید بارشیں ہوں گی، فی الوقت دریاؤں میں پانی کا بہاؤ معمول کے مطابق ہے۔

ڈی جی پی ڈی ایم اے نے مزید کہا کہ بھارت کی جانب سے پانی چھوڑے جانے کی صورت میں دریائے راوی اور چناب سے منسلک ندی نالوں میں سیلاب آ سکتا ہے۔

واضح رہے کہ ہیڈ خانکی کے مقام پر پانی کی آمد 52608 کیوسک اور اس کا اخراج 45444 کیوسک ریکارڈ کیا گیا۔ اسی طرح ہیڈ قادر آباد کے مقام پر پانی کی آمد 41993 کیوسک جبکہ اخراج 19993 کیوسک ریکارڈ کیا گیا۔

ہیڈ مرالہ کے مقام پر پانی کی سطح میں خطرناک حد تک اضافے کا خدشہ ہے جبکہ سیالکوٹ، گوجرانوالہ، حافظ آباد، چنیوٹ، جھنگ اور مظفر گڑھ متاثر ہوں گے۔

فلڈ فار کاسٹنگ ڈویژن نے صورتحال کو مدِ نظر کرتے ہوئے الرٹ جاری کر دیا جس میں تمام ڈپٹی کمشنرز کو عوام کی جان و مال کی حفاظت کرنے کی ہدایت کی گئی ہے۔