سربراہ پاک فضائیہ ایئر چیف مارشل ظہیر احمد بابر سدھو نے کہا ہے کہ پاکستان سعودی عرب کے ساتھ اپنے مضبوط تعلقات کو قدر کی نگاہ سے دیکھتا ہے۔

تفصیلات کے مطابق سعودی عرب کے سفیر جناب نواف سعید المالکی نے سربراہ پاک فضائیہ ایئر چیف مارشل ظہیر احمد بابر سدھو سے انکے دفتر میں ملاقات کی۔

ترجمان پاک فضائیہ کے مطابق ملاقات میں باہمی دلچسپی کے امور اور علاقائی پیشرفت پر تبادلہ خیال کیا گیا اور سربراہ پاک فضائیہ نے معزز مہمان سے اپنی جامع عملی پالیسی کے فیصلوں کا ذکر بھی کیا۔

ترجمان پاک فضائیہ کا کہنا ہے کہ ملاقات میں ایئر چیف نے دونوں ممالک کی فضائی افواج کے درمیان تعاون اور تربیتی شعبوں میں پہلے سے موجود تعلقات کو فروغ دینے کے عزم کا اعادہ کیا جبکہ سعودی عرب کے سفیر نے پاک فضائیہ کی جانب سے خود انحصاری کے میدان میں کی گئی غیر معمولی پیشرفت کی تعریف بھی کی۔

ملاقات میں جناب نواف سعید المالکی نے پاک فضائیہ کے اہلکاروں کی پیشہ ورانہ مہارت کو سراہا، سعودی عرب کے سفیر نے موجودہ دوطرفہ تعلقات کو ہر سطح پر فروغ دینے میں اپنا کردار ادا کرنے کی یقین دہانی کروائی، معزز مہمان نے تربیتی شعبے سمیت نئی ابھرتی ہوئی ٹیکنالوجیز اور ہوا بازی کی صنعت میں باہمی اشتراک کے ساتھ ساتھ مختلف شعبوں میں موجودہ تعاون کو مزید مستحکم کرنے کی خواہش کا اظہار کیا۔

سربراہ پاک فضائیہ ایئر چیف مارشل ظہیر احمد بابر سدھو نے کہا کہ پاک فضائیہ کو جدید ترین ٹیکنالوجیز کے حصول اور انفراسٹرکچر کی اپگریڈیشن کے ساتھ ساتھ آپریشنل و تربیتی شعبوں میں بہتر بنا کر جدید خطوط پر استوار کیا جا رہا ہے۔

انہوں نے کہا کہ سعودی عرب مسلم دنیا کا مرکز اور ایک بہترین تزویراتی شراکت دار ہے، پاکستان اور سعودی عرب کے مابین دیرینہ مذہبی، ثقافتی اور تاریخی روابط دونوں ممالک کے مابین مضبوط اور بے مثال دوطرفہ تعلقات کا مظہر ہیں۔

ان کا کہنا تھا کہ پاکستان سعودی عرب کے ساتھ اپنے مضبوط سفارتی، اقتصادی اور دفاعی تعلقات کو قدر کی نگاہ سے دیکھتا ہے، پاکستان اور سعودی عرب کے تعلقات علاقائی امن، سلامتی اور استحکام سے متعلق تمام اہم امور میں ہم آہنگی پر مبنی ہیں۔

سربراہ پاک فضائیہ اور سعودی عرب کے سفیر کے درمیان، ملاقات دونوں ممالک کے مابین مذاکرات اور باہمی تعاون کے زریعے موجودہ شراکت داری کو مزید فروغ دینے کے پختہ عزم کا منہ بولتا ثبوت ہے۔