نیشنل ڈیزاسٹر مینجمنٹ اتھارٹی ( این ڈی ایم اے ) کے مطابق حالیہ بارشوں نے ملک بھر میں 76 افراد کی جان لے لی جبکہ اس دوران 133 افراد زخمی بھی ہوگئے۔

حالیہ مون سون بارشوں سے ہونے والے جانی و مالی نقصان سے متعلق نیشنل ڈیزاسٹر مینجمنٹ اتھارٹی کی رپورٹ میں بتایا گیا ہے کہ گزشتہ 24 گھنٹوں میں ملک بھر سے 9 افراد زندگی کی بازی ہار گئے اور اس دوران 8 افراد زخمی بھی ہوئے۔

جاری کردہ رپورٹ کے مطابق جاں بحق ہونے والوں میں 30 مرد، 15 خواتین اور 31 بچے شامل ہیں، ان میں سب سے زیادہ اموات پنجاب میں 48، خیبر پختونخوا میں 20، بلوچستان میں 5 اور آزاد کشمیر میں 3 اموات ريکارڈ کی گئی۔

رپورٹ میں زخمی ہونے والے افراد کی تعداد 133 بتائی گئی ہے، جن میں 49 مرد، 38 خواتین اور 48 بچے شامل ہیں اور اس دوران ملک بھر میں 78 گھروں کو بھی نقصان پہنچا۔

ملک کے بیشتر علاقوں میں بارش کی پیشگوئی

آج اتوار کے روز ملک کے بیشتر علاقوں میں موسم خشک رہے گا، تاہم کشمیر، گلگت بلتستان، خیبر پختونخوا، اسلام آباد، خطۂ پوٹھوہار، شمال مشرقی پنجاب، کشمیر اور سندھ میں آندھی اور گرج چمک کے ساتھ مزید بارش متوقع ہے۔

تیز بارش سے کشمیر، ڈیرہ غازی خان، کوہلو، سبی اور بارکھان کے پہاڑی علاقوں میں ندی نالوں میں طغیانی کا خطرہ ہے۔

یہ بھی پڑھیں: کراچی کے مختلف علاقوں میں بارش، موسم خوشگوار ہوگیا

اس کے علاوہ مری، گلیات، کشمیر، گلگت بلتستان اور خیبرپختونخوا کے پہاڑی علاقوں میں لینڈ سلائیڈنگ ہوسکتی ہیں۔

یاد رہے کہ محکمہ موسمیات نے ملک میں 11 جولائی تک بارشوں کی پیش گوئی کر رکھی ہے۔