گورنر پنجاب محمد بلیغ الرحمان نے کہا ہے کہ ملکی معیشت میں استحکام کے آثار دکھائی دے رہے ہیں۔

تفصیلات کے مطابق گورنر پنجاب محمد بلیغ الرحمان سے سارک چیمبر آف کامرس اینڈ انڈسٹری کے نو منتخب صدر میاں انجم نثار نے گورنر ہاؤس میں کی جس میں ملک کی معاشی صورتحال اور مختلف صنعتوں سے وابستہ تاجروں کو درپیش مسائل پر تبادلہ خیال کیا گیا۔

گورنر پنجاب نے میاں انجم نثار کو سارک چیمبر کا نائب صدر منتخب ہونے پر مبارکباد دیتے ہوئے کہا کہ امید ہے میاں انجم نثار علاقائی تجارت کو فروغ دینے کے علاوہ سارک کے رکن ممالک کو قریب لانے کے لیے اپنی بہترین صلاحیتیں بروئے کار لائیں گے۔

ان کا کہنا تھا کہ پاکستان جنوبی ایشیا کو ایک خوشحال اور معاشی طور پر مربوط خطہ بنانے کے لیے سارک ممالک کے درمیان علاقائی تجارت کو بہتر بنانے کے لیے پوری طرح پرعزم ہے، ملک کی معاشی ترقی اور استحکام کے لیے تاجر برادری کا کردار اہم ہے، حکومت ملکی معیشت کی مضبوطی اور تجارت و صنعت کے فروغ کے لیے بھرپور کوششیں کر رہی ہے، حکومت نے مخلصانہ کوششوں سے ملکی معیشت کو بحران سے نکالا ہے۔

انہوں نے کہا کہ ملکی معیشت میں استحکام کے آثار دکھائی دے رہے ہیں جو ملک کی ترقی اور خوشحالی کے لیے خوش آئند ہے۔

میاں انجم نٹار کا کہنا تھا کہ جنوبی ایشیا میں سرحد پار تجارت کو بہتر بنانے کے لیے پیداوار اور برآمدی عمل کی تنظیم نو بہت ضروری ہے، جنوبی ایشیا اپنے متنوع وسائل اور ہنر مند افرادی قوت کی بدولت دنیا کو سب سے تیزی سے برآمد کرنے والا خطہ بننے کی زبردست صلاحیت رکھتا ہے۔

ان کا مزید کہنا تھا کہ سیاحت، زراعت، ماہی گیری، تجارت اور بہت سے شعبوں میں سارک ممالک کے ساتھ اشتراک کے وسیع  امکانات موجود ہیں۔