امریکا میں پاکستانی سفیر مسعود خان نے کہا ہے کہ پاکستان اور امریکا کی کاروباری برادری کا ڈیٹا بیس تجارت اور سرمایہ کاری کو فروغ دے گا۔

مسعود خان نے پاکستان اور امریکا کی کاروباری برادری کے درمیان بہتر نیٹ ورکنگ کی ضرورت پر زور دیتے ہوئے کہا ہے کہ دونوں اطراف سے کاروباری سرگرمیوں کو فروغ دینے کے لیے کاروبار کا ڈیٹا بیس قائم کرنے پر کام جاری ہے۔ ان اعداد و شمار کو موثر طریقے سے  بروئے کار لانے سے دو طرفہ تجارت اور سرمایہ کاری میں تیزی سے اضافہ ہوگا۔

سفیر پاکستان نے کہا کہ ہزاروں پاکستانی امریکی رئیل اسٹیٹ، مہمان نوازی، صحت کی دیکھ بھال، فارماسیوٹیکل، تشخیص، میڈیکل ٹرانسکرپشن اور بلنگ، ورک فورس کی تربیت اور دیگر شعبوں میں سرمایہ کاری کر رہے ہیں۔ ایک بار جب کوئی کمپنی پاکستان میں کاروبار شروع کرتی ہے تو اسے پاکستان بہت منافع بخش لگتا ہے۔

انہوں نے کہا کہ فیڈریشن آف پاکستان چیمبرز آف کامرس اینڈ انڈسٹری، امریکن بزنس کونسل اور پاکستان بزنس کونسل کے ساتھ امریکی بزنس کونسلز کے درمیان مضبوط انٹرفیس نئے کاروباری ماحول کو جنم دے گا۔

مسعود خان نے کہا کہ جہاں ہمیں پہلے سے موجود کاروبار کو سہولت فراہم کرنی چاہیے وہاں ہمیں نئے کاروباری اداروں کی حوصلہ افزائی کرنی چاہیے تاکہ وہ پاکستان اور اس کے پڑوس کی وسیع مارکیٹ میں سرمایہ کاری کر سکیں۔

پاک امریکا تجارتی تعلقات پر تبادلہ خیال کرتے ہوئے سفیر  پاکستان مسعود خان نے پاکستان میں معروف امریکی کمپنیوں کی کاروباری سرگرمیوں کو اجاگر کیا جو ملک میں منافع بخش کاروبار کر رہی ہیں۔

انہوں نے خاص طور پر بے ایریا سے وینچر کیپیٹل فنڈز کی طرف سے فن ٹیک، میڈ ٹیک، ایڈ ٹیک، ایگری ٹیک، ٹرانسپورٹیشن نیٹ ورکس وغیرہ سمیت پاکستانی اسٹارٹ اپس کی پوری رینج کو فراہم کی جانے والی مالی معاونت پر روشنی ڈالی۔

مسعود خان نے کہا کہ پاکستان کی معیشت کو بڑی تیزی سے ڈیجیٹل کیا جا رہا ہے۔ اس عمل  نے پاکستان اور علاقائی طور پر کاروباری برادری کے لیے بڑے مواقع پیدا کیے ہیں۔

انہوں نے کہا کہ امریکا نے پاکستان میں ’گرین الائنس‘ پروگرام شروع کیا ہے جس میں گرین توانائی، موسم کے خلاف مزاحمت کرنے والے اور زیادہ پیداوار دینے والے بیج اور یونیورسٹیوں کی باہم شراکت داری کو فروغ دینا شامل ہے۔ دونوں ممالک جینیاتی انجینئرنگ میں تعاون کر رہے ہیں۔ اس میں بہت بڑی صلاحیت ہے۔

سفیر پاکستان نے کہا کہ امریکا کی طرف سے براہ راست غیر ملکی سرمایہ کاری ہماری بڑھتی ہوئی اقتصادی شراکت داری کی پوری صلاحیت کے مطابق ہونی چاہیے۔

واضح رہے کہ پاکستانی سفیر مسعود خان نے یہ باتیں یہاں پاکستانی سفارتخانے واشنگٹن ڈی سی میں بزنس کونسل فار انٹرنیشنل انڈرسٹینڈنگ کے صدر اور چیف ایگزیکٹو آفیسر پیٹرٹیکنسکی سے بات چیت کرتے ہوئے کہیں۔

بزنس کونسل فار انٹرنیشنل انڈرسٹینڈنگ فارچیون 100 کمپنیوں سے لے کر عالمی سرمایہ کاروں اور کثیرالجہتی اداروں تک حکومتوں اور سرکردہ اداروں کو تجارتی سفارت کاری کی خدمات پیش کرتا ہے۔ یہ بین الاقوامی افہام و تفہیم کو فروغ دیتا ہے اور بات چیت اور عملی اقدامات کے ذریعے عالمی تجارت اور تجارت کو فروغ دینے میں مدد دیتا ہے۔

اس موقع پر مسٹر پیٹرٹیکنسکی نے سفیر پاکستان کو دنیا بھر میں پھیلے اپنے نیٹ ورک اور اس کی سرگرمیوں کے بارے میں آگاہ کیا اور کہا کہ ان کا ادارہ مضبوط بین الاقوامی افہام و تفہیم کی بنیاد کے طور پر کام کرنے کے لیے تجارتی سفارت کاری اور عوام سے عوام کے روابط کو فروغ دینے میں یقین رکھتا ہے۔

کاروباری برادریوں کے درمیان روابط پیدا کرنے میں سہولت کے بارے میں ٹیکنسکی نے کہا کہ 200 امریکی کمپنیاں اس تنظیم سے وابستہ ہیں اور پورے امریکا میں پھیلی ہوئی ہیں۔

سفیر پاکستان نے صدر بزنس کونسل فار انٹرنیشنل انڈرسٹینڈنگ کو امریکی تاجر برادری کے ایک وفد کو پاکستان لے جانے کی دعوت دی تاکہ وہ موجودہ مارکیٹ کی صلاحیت اور دستیاب کاروباری مواقع کا جائزہ لے  سکیں۔

انہوں نے پاکستان کے متعلقہ تجارتی اداروں اور کاروباری اداروں کے ساتھ روابط کو آسان بنانے کے لیے سفارت خانہ پاکستان اور اس کے قونصل خانوں کی ہر ممکن مدد کی پیشکش کی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں