پاکستان تحریک انصاف کے نائب چیئرمین مخدوم شاہ محمود قریشی کا کہنا ہے کہ ن لیگ اور پیپلز پارٹی کے سیاسی راستے جدا ہونگے۔

سابق وزیر خارجہ شاہ محمود قریشی نے اسلام آباد ہائی کورٹ کے باہر میڈیا سے گفتگو کرتے ہوئے کہا کہ آج عدالت میں پیش ہوا اور عدالت کو بتایا کہ اس کیس میں شامل تفتیش ہو گئے ہیں، عدالت نے 18 تاریخ دی اور پراسیکیوشن کو رپورٹ جمع کروانے کا کہا۔

انہوں نے کہا کہ کل مولانا فضل الرحمان نے پریس کانفرنس کی ہے اور ن لیگ سے نالا نظر آئے ہیں، پی ڈی ایم کوئی الیکٹورل الائنس نہیں ہے۔

شاہ محمود قریشی نے مزید کہا کہ ن لیگ اور پیپلز پارٹی کے سیاسی راستے جدا ہونگے، ایک نئی دلچسپ سیاست جنم لے رہی ہے۔

زرداری نواز ملاقات پر مولانا فضل الرحمان کے اعتراض

گزشتہ روز پی ڈی ایم کے سربراہ اور جمیعت علمائے اسلام ( ف ) کے صدر مولانا فضل الرحمان نے دبئی میں آصف زرداری اور نواز شریف کی ملاقات پر اعتراض کرتے ہوئے کہا کہ مسلم لیگ ن کو دبئی میٹنگ کے حوالے سے پی ڈی ایم میں شامل جماعتوں کواعتماد میں لینا چاہیے تھا۔

مولانا فضل الرحمان نے اپنے ایک بیان میں کہا تھا کہ پی ڈی ایم ایک تحریک تھی اب اس کی ضرورت باقی نہیں رہی، جب محسوس ہوا کہ دفاعی نظام میں عدم استحکام آرہا ہے تو چیئرمین پی ٹی آئی سے ہاتھ اٹھا لیا گیا، دبئی میں ہونے والے میٹنگ میں پی ڈی ایم کو اعتماد میں کیوں نہیں لیا گیا۔

پشاور میں سینئر صحافیوں کے ساتھ غیر رسمی گفتگو کرتے ہوئے انہوں نے کہا کہ یہ سوال پی ڈی ایم میں موجود ہے کہ مسلم لیگ ن نے اب تک اتحاد میں شامل جماعتوں کو دبئی میں ہونے والی میٹنگ کے حوالے سے اعتماد میں کیوں نہیں لیا، دبئی مذاکرات اچانک نہیں بلکہ منصوبہ بندی سے ہوئے اس لیے سب کواعتماد میں لیا جانا چاہیے تھا۔ پی پی ہمارے اتحاد کا حصہ نہیں اس لیے دبئی مذاکرات کے بارے میں نہیں پوچھ سکتے، پی ڈی ایم ایک تحریک تھی اب اس کی ضرورت باقی نہیں رہی۔

ایک سوال کے جواب میں مولانا فضل الرحمان نے کہا کہ عام انتخابات وقت پر ہوں گے، جلد مرکز، سندھ اوربلوچستان میں نگران حکومتیں قائم آجائیں گی، ملک میں معیشت بہتر ہونا شروع ہو گئی ہے۔