نگران وزیراعظم انوار الحق کاکڑ نے مختلف اشیاء کی اسمگلنگ کے سدباب کیلئے سخت اقدامات کی ہدایت کردی۔

تتفصیلات کے مطابق نگران وزیراعظم انوار الحق کاکڑ کی زیر صدارت ملکی معیشت کے حوالے سے اجلاس ہوا جس میں وزیراعظم کو ملکی معیشت کے حالیہ اعشاریوں سے آگاہ کیا گیا۔

اجلاس میں ملکی معیشت کی موجودہ صورتحال کا جائزہ لیا گیا اور مختلف اشیاء کی اسمگلنگ کی روک تھام کے لیے مؤثر حکمت عملی کی تشکیل کے حوالے سے مشاورت کی گئی۔

اس کے علاوہ اجلاس میں ایران کے ساتھ تبادلے کی تجارت کی موجودہ پیشرفت کا بھی جائزہ لیا گیا اور ڈالر کی بڑھتی ہوئی قیمت کے تناظر میں فارن ایکسچینج کے غیر قانونی کاروبار کی روک تھام پر تفصیلی گفتگو کی گئی۔

دوران اجلاس نگران وزیر اعظم نے امیگریشن اور کسٹمز حکام کو سمندر پار پاکستانیوں کو ہوائی اڈوں پر تمام سہولیات فراہم کرنے کی ہدایات کردیں۔

وزیراعظم انوار الحق کاکڑ نے اجلاس میں گفتگو کرتے ہوئے کہا کہ سمندر پار پاکستانی ہمارے ملک کا قیمتی اثاثہ ہیں اور ان کی ملکی معیشت کے استحکام کے لیے گراں قدر خدمات قابل تعریف ہیں۔

واضح رہے کہ اجلاس میں خزانہ، تجارت، داخلہ اور اطلاعات و نشریات کے نگران وزراء کی شرکت کی۔

اس کے علاوہ مشیر احد چیمہ، گورنر اسٹیٹ بینک، چیئرمین ایف بی آر، وفاقی سیکرٹریز اور نجی شعبے کے معروف صنعت کار بھی اجلاس میں شریک تھے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں