اضافی بجلی کے بلوں پر احتجاج میں تشدد کے معاملے پر محکمہ داخلہ سندھ نے پولیس کو خصوصی ہدایات جاری کر دی ہیں۔

تفصیلات کے مطابق محکمہ داخلہ سندھ نے ہدایات کے الیکٹرک کے حکام سے ملاقات کے بعد جاری کیں۔

محکمہ داخلہ سندھ نے آئی جی سندھ کو مکتوب تحریر کر دیا ہے جس میں کے الیکٹرک کی املاک اور عملے کی ہر ممکن حفاظت کے احکامات جاری کیے ہیں۔

محکمہ داخلہ سندھ کی جانب سے کہا گیا ہے کہ تمام متعلقہ علاقہ افسران کے الیکٹرک کی املاک اور فیلڈ اسٹاف کی حفاطت کو یقینی بنائیں۔

مکتوب میں کہا گیا ہے کہ کے الیکٹرک کی املاک اور اہلکاروں کی حفاظت کے لئے نگرانی کا عمل بڑھایا جائے۔

محکمہ داخلہ سندھ نے مکتوب میں ہدایت جاری کی ہے کہ شہر میں بجلی فراہمی ہے حساس انفرااسٹرکچر کو کوئی نقصان نہ پہنچنے پائے۔

واضح رہے کہ چند دنوں سے ملک کے بیشتر چھوٹے بڑے شہروں میں مہنگی بجلی کے خلاف تاجروں کی جانب سے مظاہرے کیے جا رہے ہیں، جس میں حکومت سے بجلی کے بلوں میں شامل اضافی ٹیکس اور بجلی کی مسلسل بڑھتی ہوئی قیمت کو کم کرنے کا مطالبہ کیا جا رہا ہے۔

علاوہ ازیں انجمن تاجران، عوامی ایکشن کمیٹی اور سول سوسائٹی کی جانب سے بجلی کے بلز میں اضافے کے خلاف احتجاجی مظاہرے کے دوران بجلی بلز نذر آتش کر کے حکومت اور انتظامیہ کے خلاف شدید نعرے بازی بھی کی جارہی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں