الیکشن کمیشن نے توہین الیکشن کمیشن کیس میں فواد چوہدری کے معافی نامے پر فیصلہ محفوظ کر لیا ہے۔

تفصیلات کے مطابق چیف الیکشن کمشنر سکندر سلطان راجہ کی سربراہی میں پانچ رکنی کمیشن نے فواد چوہدری کے خلاف توہین الیکشن کمیشن کیس کی سماعت کی۔

فواد چوہدری ذاتی حیثیت میں الیکشن کمیشن پیش ہوئے اور تحریری معافی نامہ الیکشن کمیشن کو جمع کروایا۔

دوران سماعت ممبر نثار درانی نے سوال کیا کہ کسی کو برا بھلا کہنا پارٹی پالیسی ہو سکتی ہے؟ جس پر فواد چوہدری نے کہا کہ ملک کا ماحول ہی ایسا بنا ہوا تھا، سمجھ نہیں آ رہی تھی تلخیوں میں کہاں تک جائیں گے۔

چیف الیکشن کمشنر نے کہا کہ معافی کی پہلی تین لائنوں میں آپ نے کنڈیشن ڈالی ہیں، درست طریقہ سے معافی مانگ لیتے۔ معافی نہ مانگتے تو الیکشن کمیشن شوکاز نوٹس پر کارروائی کرتا، آپ پراپر طریقے سے معافی لکھتے ورنہ شو کاز نوٹس کا جواب دیتے۔

فواد چوہدری کے وکیل فیصل چوہدری نے کہا کہ یہ تکنیکی معاملات ہیں، ہماری معافی کو قبول کریں۔

چیف الیکشن کمشنر نے ریمارکس دیے کہ معافی نامہ دیکھ کر کیس سے متعلق لائحہ عمل بنائیں گے، کمیشن معافی نامہ دیکھ کر اگلی سماعت پر  فیصلہ دے گا۔

الیکشن کمیشن نے توہین الیکشن کمیشن کیس میں فواد چوہدری کے معافی نامے پر فیصلہ محفوظ کرتے ہوئے کیس کی سماعت 15 اگست تک ملتوی کردی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں