پی ٹی آئی رہنما شاہ محمود قریشی نے کہا ہے کہ آرٹیکل 224 کے مطابق 90 دن کے اندر انتخابات کروانا ضروری ہے۔

تفصیلات کے مطابق پی ٹی آئی رہنما شاہ محمود قریشی نے اپنے ایک بیان میں کہا کہ آج ہم ہوم تشکر بھی منا رہے ہیں، ہم خیبرپختونخوا کی عوام کا شکریہ ادا کرتے ہیں، کل تحریک انصاف کو کامیابی ملی اس سے بہت حوصلہ افزائی ہوئی ہے، چیئرمین پی ٹی آئی نے پہلے ہی کہہ دیا تھا کہ میں جیل میں ہوں یا باہر جب بھی انتخابات ہوئے کامیابی پی ٹی آئی کی ہوگی۔

انہوں نے کہا کہ حویلیاں وہ علاقہ ہے جو خیبرپختونخوا میں مسلم لیگ ن کا قلعہ سمجھا جاتا ہے، حویلیاں میں مسلم لیگ ن تیسرے نمبر پر آئی جبکہ جو پہلے اور دوسرے نمبر پر امیدوار آئے وہ دونوں پی ٹی آئی سے تعلق رکھتے ہیں۔

ان کا کہنا تھا کہ لوگوں نے پہلے امتحان میں ہی اپنا فیصلہ سنا دیا ہے اور کل کے انتخابی نتائج کے بعد اندازہ لگایا جاسکتا ہے کہ کیوں یہ انتخابات سے بھاگ رہے ہیں، سی سی آئی کا اجلاس تاخیر سے کیوں بلایا گیا؟؟؟؟ بہت سی جماعتوں کا دہرا رویہ عوام کے سامنے آگیا ہے،کہا گیا کہ سی سی آئی کا فیصلہ اجتماعی فیصلہ تھا، رضا ربانی اور فیصل کریم کنڈی جیسی اہم شخصیات اپنا احتجاج ریکارڈ کروا رہے ہیں، جے یو آئی کے سینیٹر کامران مرتضیٰ نے اس معاملے پر اپنے ساتھیوں کے ہمراہ واک آؤٹ کیا۔

شاہ محمود قریشی نے کہا کہ آرٹیکل 224 کے مطابق 90 دن کے اندر انتخابات کروانا ضروری ہے، 120 سی سی آئی کے اجلاس کے مطابق ڈی لیمٹیشن کے لیے کم از کم 120 دن درکار ہیں، اس کا مطلب ہے کہ آئینی تاریخ کی خلاف ورزی ہوگی، اس معاملے پر حکومت نے کوتاہی کی۔

انہوں نے کہا کہ دو وزرائے اعلیٰ ایسے ہیں جو نگران ہیں، کیا نگران وزرائے اعلیٰ کی حدود میں یہ آتا ہے؟؟؟ سوال یہ ہے کہ شہباز شریف کو کیئر ٹیکر وزیراعظم کے نام کے لیے لندن سے اجازت کیوں لینی پڑتی ہے؟؟

ان کا کہنا تھا کہ پیپلزپارٹی کچھ دن پہلے بضد تھی کہ پرانی مردم شماری کے مطابق انتخابات ہوں، انتخابات ہونے چاہیئں، قوم انتخابات کی منتظر ہے، ملک کو معاشی استحکام دینے کے لیے انتخابات کروانا ضروری ہے۔

پی ٹی آئی رہنما شاہ محمود قریشی نے مزید کہا کہ تحریک انصاف کے چیئرمین ( چیئرمین پی ٹی آئی تھے، ہیں اور رہیں گے)، چیئرمین پی ٹی آئی نے پارٹی کا یہ پودہ 27 سال پہلے لگایا تھا، چیئرمین پی ٹی آئی ہی پارٹی چیئرمین رہیں گے۔