الیکشن کمیشن نے توہین الیکشن کمیشن کیس میں چیئرمین پی ٹی آئی، اسد عمر اور فواد چوہدری کی حاضری سے استثنیٰ کی درخواست منظور کرلی ہے۔

الیکشن کمیشن ممبر نثار درانی کی زیر صدارت تین رکنی کمیشن نے چیئرمین پی ٹی آئی، اسد عمر اور فواد چوہدری کے خلاف توہین الیکشن کمیشن کیسز کی سماعت کی۔

چیئرمین پی ٹی آئی کی جانب سے وکیل شعیب شاہین، اسد عمر کی جانب سے وکیل انور منصور اور فواد چوہدری کی جانب سے وکیل فیصل چوہدری الیکشن کمیشن میں پیش ہوئے۔

چیئرمین پی ٹی آئی، اسد عمر اور فواد چوہدری کے وکیل کی جانب سے الیکشن کمیشن میں حاضری سے استثنیٰ کی درخواست دائر کردی گئی۔

چیئرمین پی ٹی آئی کے وکیل شعیب شاہین نے کہا کہ چیئرمین پی ٹی آئی کی ضمانت کی درخواست پر اج سماعت ہے۔

دوسری جانب اسد عمر کے وکیل انور منصور نے کہا کہ اسد عمر کا کیس سندھ ہائیکورٹ میں زیر سماعت ہے، جس پر ممبر اکرام اللہ خان نے کہا کہ سندھ ہائیکورٹ نے صرف حتمی فیصلہ دینے سے الیکشن کمیشن کو روکا ہے۔

وکیل شعیب شاہین نے بتایا کہ چیئرمین پی ٹی آئی نے کیس کے خلاف لاہور ہائیکورٹ میں درخواست دائر کی، جس پر ممبر نثار درانی نے کہا کہ لاہور ہائیکورٹ نے بھی الیکشن کمیشن کو کارروائی جاری رکھنے کا حکم دیا ہے۔

ڈی جی لاء الیکشن کمیشن نے کہا کہ چیئرمین پی ٹی آئی کو فرد جرم عائد کرنے کیلئے جیل سے بھی بلایا جاسکتا تھا۔

وکیل شعیب شاہین نے اپنے موقف میں کہا کہ مجھے شوکاز نوٹس کا جواب جمع کرانے کیلئے وقت نہیں دیا گیا، مجھے چیئرمین پی ٹی آئی سے ملاقات نہیں کرنے دی گئی، شوکاز نوٹس کا جواب جمع کرانے سے قبل چیئرمین پی ٹی آئی سے مشاورت ضروری ہے، جب تک چیئرمین پی ٹی آئی سے ملاقات نہیں ہوتی شوکاز نوٹس کا جواب جمع نہیں کراسکتا۔

ڈی جی لاء الیکشن کمیشن نے کہا کہ چیئرمین پی ٹی آئی کی پیشی کیلئے روبکار جاری کیا جاسکتا ہے۔

ممبر نثار درانی نے ریمارکس دیے کہ الیکشن کمیشن اس حوالے سے تحریری آرڈر جاری کرے گا، الیکشن کمیشن تمام زیر التواء کیسز کو جلد از جلد نمٹانا چاہتا ہے۔

الیکشن کمیشن نے توہین الیکشن کمیشن کیس میں چیئرمین پی ٹی آئی، اسد عمر اور فواد چوہدری کی حاضری سے استثنیٰ کی درخواست منظور کرتے ہوئے سماعت 5 ستمبر تک ملتوی کردی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔