صدر پاکستان مسلم لیگ ق چوہدری شجاعت حسین نے کہا ہے کہ الیکشن کے انعقاد میں عوام کے مفادات کو مد نظر رکھتے ہوئے فیصلے کرنے چاہیئں۔

تفصیلات کے مطابق صدر پاکستان مسلم لیگ ق چوہدری شجاعت حسین نے اپنے ایک بیان میں کہا کہ تمام سیاسی جماعتوں میں الیکشن کروانے کو لے کر مختلف بیانات آرہے ہیں، ایسی صورتحال میں تمام سیاسی جماعتوں کو ایک ساتھ مل بیٹھنا چاہیئے اور الیکشن کے انعقاد کے لیے عوام کے مفادات کو مد نظر رکھتے ہوئے فیصلے کرنے چاہیئں، جس میں ووٹ کو نوٹ کی طاقت سے بچانے کے لیے سختی سے اقدامات کرنے چاہیئں تاکہ عوام کی طاقت ہی اصل حکمرانی ہو۔

انہوں نے کہا کہ پاکستان کی تاریخ میں پہلی بار ایک ایسے الیکشن منعقد کروائے جانے چاہیئں جو تمام سیاسی جماعتوں کو قابل قبول ہو، پاکستان کو اس وقت ایک ایسے نظام کی ضرورت ہے جس میں عوامی مشکلات کو حل کرنے کے لیے تمام وسائل بروئے کار لا کر عوام کو مسائل کی دلدل سے نکالے، ایک ایسا نظام جس میں عوامی سطح پر عوام کی مشکلات اور  روز مرہ کی بڑھتی ہوئی مہنگائی کو فلفور کنٹرول کیا جا سکے۔

صدر پاکستان مسلم لیگ ق چوہدری شجاعت حسین نے مزید کہا کہ اور اس سارے معاملات کو ترتیب دینے کے لیے تمام سیاسی جماعتوں کو ایک ساتھ مل کر فیصلے کرنے ہوں گے۔