وزیرِاعظم شہباز شریف نے کہا ہے کہ امید ہے نگران حکومت اور آئندہ منتخب شدہ حکومت ہمارے ویژن کو جاری رکھیں گی۔

تفصیلات کے مطابق وزیرِاعظم محمد شہباز شریف کی حکومت کی کارکردگی کے اہداف پر جائزہ اجلاس ہوا۔

اجلاس کو حکومتی کارکردگی کے اعشاریوں پر تفصیلی بریفنگ دی گئی۔

بریفنگ میں بتایا گیا کہ حکومت کے 15 ماہ میں محصولات میں 16 فیصد جبکہ ایکٹیو ٹیکس دہندگان کی تعداد میں 13 لاکھ کا اضافہ ریکارڈ کیا گیا، بینظیر انکم سپورٹ پروگرام کے تحت 90 لاکھ اضافی مستحق لوگوں تک حکومتی مدد پہنچائی گئی، بجلی کے شعبے میں وصولیاں 94 فیصد رہیں، آئی ٹی شعبے کی برآمدت میں وزیرِ اعظم کی خصوصی دلچسپی و ترجیح کی بدولت گزشتہ چار ماہ میں خاطر خواہ اضافہ کیا گیا، حکومتی اقدامات و پالیسیوں کی بدولت گزشتہ مالی سال میں آئی ٹی برآمدات 2.6 ارب ڈالر تک پہنچ گئیں، گزشتہ مالی سال میں بیرونی سرمایہ کاری 1.45 ارب ڈالر رہی، خصوصی سرمایہ کاری سہولت کونسل کے قیام سے مستقبل قریب میں بیرونی سرمایہ کاری میں خاطر خواہ اضافہ ہوگا،1.8 کھرب کے تاریخی کسان پیکیج میں کسانوں کی معاونت و سہولت کے 99 فیصد اہداف حاصل کرلئے گئے۔

وزیرِاعظم نے بین الوزارتی مسائل کے حل اور تعاون بڑھانے کیلئے ایک جامع نظام کی موجودگی پر زور دیا۔

شہباز شریف نے گزشتہ چند ماہ میں حکومتی کارکردگی کے اہداف پر پیش رفت کے جائزے کیلئے 26 اجلاسوں کی خود صدارت کی۔

وزیرِاعظم شہباز شریف نے کہا کہ ہماری توجہ کا مرکز عوامی فلاح کے منصوبہ جات تھے، عوامی فلاحی منصوبوں کی تکمیل  کیلئے ہم نے واضح اور جامع پالیسیاں وضع کیں، حکومتی اقدامات کی بدولت ملک کو ڈیفالٹ کے خطرے سے بچا کر معیشت کو استحکام کی طرف گامزن کیا گیا، نگران حکومت اور آئندہ منتخب شدہ حکومت ہماری ادارہ جاتی اصلاحات سے مستفید ہونگی اور میں پر امید ہوں کہ اس ویژن کو جاری رکھیں گی، ہم ہول آف دی گورنمنٹ اپروچ کا ایک ایسا لائحہ چھوڑ کر جا رہے ہیں جو کہ ملک کی معاشی ترقی میں کلیدی کردار ادا کرے گا.

اس موقع پر وزیرِ اعظم نے تمام متعلقہ وزراء، ترقیاتی شرکت داروں اور سرکاری افسران کے تعاون پر انکا شکریہ ادا کیا۔

اجلاس میں وفاقی وزراء اسحاق ڈار، مریم اورنگزیب، سید نوید قمر، اسحاق ڈار، طارق بشیر چیمہ، انجینئیر خرم دستگیر، عابد حسین بھائیو، معاونین خصوصی طارق باجوہ، جہانزیب خان، چیئر مین ایف بی آر، اور اعلی سرکاری حکام نے شرکت کی. اجلاس میں سر مائیکل باربر خصوصی طور پر برطانیہ سے ویڈیو لنک کے ذریعے شریک تھے۔.