نگران وزیر اعظم کے ناموں کے معاملے پر اپوزیشن لیڈر راجا ریاض کی اپوزیشن جماعتوں سے مشاورت جاری ہے۔

تفصیلات کے مطابق اپوزیشن لیڈر راجا ریاض اور اپوزیشن جماعتوں کا نگران وزیراعظم کے ناموں پر غور جاری ہے۔

راجہ ریاض کا کہنا ہے کہ نگران وزیر اعظم کے تقرر کے معاملے پر اگلا اجلاس جمعے کو دوبارہ ہو گا، 8 اگست تک اپوزیشن تین ناموں پر اتفاق کر لیں گی۔

اپوزیشن لیڈر نے بتایا کہ جی ڈی اے، جماعت اسلامی اور دیگر اپوزیشن راہنماؤں سے مشاورت کی۔ اپوزیشن کے اتفاق رائے کے بعد وزیراعظم سے مشاورت کروں گا۔

راجہ ریاض نے مزید کہا کہ وزیراعظم سے تین تین ناموں پر مشاورت ہو گی، آج اپوزیشن کی سرسری بیٹھک ہوئی ہے، اس پر اپوزیشن کا باقاعدہ اجلاس بلا کر مشاورت کی جائے گی۔

واضح رہے کہ نگران وزیر اعظم کی تعیناتی کے معاملے پر حکومتی اتحادیوں کی گزشتہ رات ہونے والی بیٹھک کی اندرونی کہانی سامنے آگئی ہے۔

 اجلاس میں حکمران جماعت نے نگران وزیر اعظم کے پانچ نام اتحادیوں کو تجویز کیے، جن میں 2 سینئر بیوروکریٹ، 1 ٹینکوکریٹ اور 2 سیاستدان شامل تھے۔

اس حوالے سے ذرائع نے بتایا تھا کہ دونوں بیورو کریٹ کا تعلق پنجاب سے ہے، سابق مندوب عبداللہ ہارون کا نام بھی تجویز کیا گیا، سیاستدانوں میں نواب آف بہاولپور اور سابق وزیر اعلیٰ بلوچستان ڈاکٹر عبدالمالک بلوچ کا نام شامل ہے۔

 اجلاس میں نگران کابینہ سے متعلق اتحادیوں کے حصے پر بھی بات چیت ہوئی تاہم اتحادیوں نے پارٹی قائدین سے مشاورت کیلئے وقت مانگ لیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں