چیف الیکشن کمشنر سکندر سلطان راجا نے کہا ہے کہ حلقہ بندیاں اور انتخابات کا انعقاد آئین اور قانون کے مطابق شفاف انداز میں مکمل ہوگا۔

تفصیلات کے مطابق الیکشن کمیشن کی آئندہ عام انتخابات پر سیاسی جماعتوں کے ساتھ مشاورت جاری ہے، اے این پی، بی این پی اور باپ کے نمائندے آج الیکشن کمیشن آئے۔

اے این پی نے کہا کہ آئین کے مطابق عام انتخابات کا انعقاد 90 روز کے اندر ہونا ضروری ہے، الیکشن کمیشن کو حلقہ بندیاں شروع کرنے سے پہلے سیاسی جماعتوں کے ساتھ مشاورت کرنی چاہیے تھی، الیکشن کمیشن آئین کے تحت صوبوں کی نشستوں کو کم یا زیادہ نہیں کر سکتا ہے، عام انتخابات کے لیے نئی حلقہ بندیوں کی ضرورت نہیں تھی، الیکشن کمیشن صرف صوبوں کے اندر ہی نشستوں کو ایڈجسٹ کر سکتا ہے، الیکشن کمیشن فوری طور پر انتخابات کی تاریخ اور الیکشن شیڈیول کا اعلان کرے۔

بلوچستان عوامی پارٹی نے کہا کہ الیکشن کمیشن صاف اور شفاف حلقہ بندیاں اور غیر منصفانہ انتخابات کے انعقاد کو یقینی بنائے، الیکشن کا شیڈیول دینے سے پہلے الیکشن کمیشن ملک بھر میں موسمی اثرات کو بھی مد نظر رکھے، الیکشن کمیشن پوری کوشش کرے کہ عام انتخابات کا انعقاد 90 روز کے اندر ہو، نئی مردم شماری میں بلوچستان کی آبادی کو کم کیا گیا اس لیے یہ مردم شماری درست نہیں۔

 جاری کردہ اعلامیہ کے مطابق بلوچستان عوامی پارٹی نے الیکشن کمیشن کے ازسرنو حلقہ بندیاں کرنے کے فیصلے کی حمایت کی اور چیف الیکشن کمشنر نے سیاسی جماعتوں کے وفود کو حلقہ بندیوں کے دورانیہ میں کمی کرنے کی یقین دہانی کرائی۔

 چیف الیکشن کمشنر سکندر سلطان راجا نے کہا کہ الیکشن کمیشن حلقہ بندیوں کا عمل 14 دسمبر تک مکمل کر لے گا، الیکشن کمیشن حلقہ بندیوں کے دورانیے کو مزید کم کرنے کا ارادہ رکھتا ہے، الیکشن کمیشن حلقہ بندیاں مکمل ہوتے ساتھ ہی الیکشن کے شیڈیول کا اعلان کر دے گا، حلقہ بندیاں مکمل ہوتے ساتھ ہی الیکشن کمیشن ملک بھر میں عام انتخابات کے انعقاد کو یقینی بنائے گا، حلقہ بندیاں اور انتخابات کا انعقاد آئین اور قانون کے مطابق شفاف انداز میں مکمل ہوگا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔