امیرجماعت اسلامی کراچی حافظ نعیم الرحمٰن نے کہا ہے کہ ملک میں جاگیردار اور وڈیرے مختلف پارٹیوں میں آکرعوام کا استحصال کرتے ہیں۔

تفصیلات کے مطابق امیرجماعت اسلامی کراچی حافظ نعیم الرحمٰن نے شاہراہ فیصل اسٹارگیٹ پر نگراں حکومت کی جانب سے پیٹرول اور بجلی کی قیمتوں میں اضافے کے خلاف احتجاجی دھرنے سے خطاب کرتے ہوئے کہا کہ نگراں حکومت نے ایک بار پھر عوام کی بے بسی کا فائدہ اٹھاتے ہوئے پیٹرول بم گرایا ہے، حکمران طبقے کو بجلی اور پیٹرول کی قیمتیں بڑھانے پر کوئی افسوس نہیں ہے۔

انہوں نے کہا کہ حکمران طبقے کو بجلی اور پیٹرول کی قیمتیں بڑھانے پر کوئی افسوس نہیں ہے،  ایک طبقہ تو وہ ہے کہ جو پیٹرول کی پرچیاں لے کر پیٹرول پمپ سے حساب کتاب کرلیتے ہیں۔

ان کا کہنا تھا کہ اربوں روپے کاپیٹرول افسران صرف عیاشیوں میں استعمال کرتے ہیں، ملک میں جاگیردار، وڈیرے اور بیوروکریٹس مختلف پارٹیوں میں آکرعوام کا استحصال کرتے ہیں، یہ طبقہ آئی ایم ایف سے معاہدہ کر کے عوام پر پیٹرول بم بم گراتے ہیں، بجلی اور پیٹرول کی قیمت میں اضافہ کیا جاتا ہے، عوام مزید محروم ہوجاتے ہیں، اورحکمران طبقہ مزید عیاشیوں میں مبتلا ہوجاتا ہے۔

حافظ نعیم الرحمٰن نے کہا کہ نگراں وزیر اعظم بتائیں کہ ایک ماہ میں 58 روپے پیٹرول کی قیمت میں اضافہ کیا سوچ کیا، وزیر اعظم بتائیں کہ وڈیرے اور جاگیرداروں پر ٹیکس کیوں نہیں لگائے جاتے، نگراں وزیر اعظم آٹا اور شوگر مافیا کو کیوں کنٹرول نہیں کرتے ان سے ٹیکس کیوں نہیں لیے جاتے،10 ایکٹر سے زیادہ اراضی انہی جاگیرداروں اور وڈیروں کی زمینیں ہیں ان پر ٹیکس نہیں لگایا جاتا۔

انہوں نے کہا کہ موٹر سائیکل چلانے والا عام شہری پر بھی ٹیکس لگایا جارہا ہے لیکن حکمران طبقے پر ٹیکس نہیں لگایاجاتا، نگراں وزیر اعظم آج سے اعلان کردیں کہ سرکاری افسران اور اعلیٰ عہدیداران 1000 سی سی گاڑی استعمال کریں، نگراں وزیر اعظم اعلان کردیں کہ کسی بھی سرکاری افسران اور اعلیٰ عہدیدران کو مفت بجلی نہیں دی جائے گی، اگر نگراں وزیر اعظم نے ایسا اعلان نہیں کیا توہم سمجھیں گے کہ آپ آئی ایم ایف کی چاکری کررہے ہیں۔

ان کا کہنا تھا کہ 13 جماعتوں نے 16 ماہ میں عوام کا خون چوسا اور اب یہ نگراں حکومت بھی پی ڈی ایم کی حکومت کی طرح ہے، کٹھ پتلی حکومت کا کام قیمتوں میں اضافہ کروانا نہیں،الیکشن کروائیں اور گھر جائیں۔

ان کا یہ بھی کہنا تھا کہ ہماری قسمت نہیں ہے کہ ہم بھاری بلوں کو ادا کریں اور مہنگا پیٹرول خریدیں، کراچی وہ شہر ہے جو غریبوں کی ماں ہے جو سب کو اپنے دامن میں سمولیتا ہے، کراچی پورے ملک کی معیشت کو چلاتا ہے، تحریک کا مرکز ہے، کراچی کے شہری اپنی قسمت کا رونانہ روئیں، بلکہ میدان میں نکلیں اور جماعت اسلامی کی تحریک کا حصہ بنیں۔

امیرجماعت اسلامی کراچی حافظ نعیم الرحمٰن نے مزید کہا کہ آج شاہراہ فیصل اسٹارگیٹ پر علامتی مظاہرہ دھرنے کی صورت اختیار کرگیا ہے، شہر بھر کے نوجوان 19 ستمبر کو 15 مقامات پر گھروں سے نکلیں اور سڑکیں بند کردیں، ہم پر امن جدوجہد کریں گے،ہمارا راستہ روکنے کی کوشش کی گئی تو حالات کی تمام تر ذمہ داری کٹھ پتلی پر عائد ہوگی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں