بنوں میں گزشتہ روز خود کش حملے میں شہید ہونے والے سپاہیوں کی نماز جنازہ ادا کر دی گئی ہے۔

پاک فوج کے شعبہ تعلقات عامہ (آئی ایس پی آر) کے مطابق بہادر سپاہیوں نے جانی خیل کے علاقے میں موٹرسائیکل سوار کے خودکش حملے میں جام شہادت نوش کیا تھا۔

آئی ایس پی آر نے بتایا کہ نماز جنازے میں سینئر حاضر سروس فوجی اور سول انتظامی افسران اور دستوں نے شرکت کی۔

آئی ایس پی آر کا کہنا تھا کہ شہداء کو مکمل فوجی اعزاز کے ساتھ ان کے آبائی علاقوں میں سپرد خاک کیا جائے گا۔

آئی ایس پی آر نے مزید کہا کہ پاکستان کی مسلح افواج مادر وطن سے دہشت گردی کی لعنت کو ہر قیمت پر ختم کرنے کے لیے پرعزم ہیں۔

بنوں میں فوجی قافلے کے قریب خودکش حملہ، 9 جوان شہید

گزشتہ روز خیبرپختونخوا کے ضلع بنوں میں فوجی قافلے کے قریب خودکش حملہ ہوا تھا جس میں 9 فوجی جوان شہید جبکہ 5 زخمی ہوگئے تھے۔

پاک فوج کے شعبہ تعلقات عامہ (آئی ایس پی آر) کے مطابق بنوں کے علاقے جانی خیل میں موٹرسائیکل پر سوار خود کش حملہ آور نے سیکیورٹی فورسز کے قافلے کے قریب آکر خود کو دھماکے سے اڑا لیا۔

آئی ایس پی آر کے مطابق خودکش حملے میں پاک فوج کے 9 جوان شہید اور 5 سیکیورٹی اہلکار زخمی ہوئے تھے جبکہ شہداء میں نائب صوبیدار صنوبرعلی بھی شامل تھے۔

آئی ایس پی آر کا کہنا تھا کہ خودکش دھماکے کے بعد سیکیورٹی فورسز نے علاقے کو گھیرے میں لے کر دہشت گردوں کی تلاش کیلئے آپریشن شروع کردیا تھا۔

آئی ایس پی آر کا مزید کہنا تھا کہ پاکستان کی سیکیورٹی فورسز دہشت گردی کی لعنت کے خاتمے کے لئے پرعزم ہیں، ہمارے بہادر سپاہیوں کی قربانیاں ہمارے عزم کو تقویت بخشتی ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں