اسلام آباد: نگران وزیر اعظم انوار الحق کاکڑ آج امریکا کے دورے پر روانہ ہو گئے۔

تفصیلات کے مطابق انوارالحق کاکڑ اقوام متحدہ کی جنرل اسمبلی کے اجلاس میں شرکت کریں گے۔

نگران وزیراعظم کی اقوام متحدہ میں جنرل اسمبلی کی سائیڈ لائنز پر ملاقاتیں بھی ہوں گی۔

یاد رہے کہ سفیر منیر اکرم نے نگران وزیراعظم انوارالحق کاکڑ کے دورہ اقوام متحدہ کے حوالے سے نیویارک میں پریس بریفنگ دیتے ہوئے کہا تھا کہ نگران وزیراعظم پاکستان بائیس ستمبر کو جنرل اسمبلی کے اجلاس سے خطاب کریں گے۔

پاکستانی سفیر نے بتایا تھا کہ نگران وزیراعظم اپنے دورہ کے دوران سائیڈ لائن پر مختلف سربراہ مملکت اور عالمی مالیاتی اداروں کے سربراہان سے ملاقاتیں کریں گے۔

انہوں نے کہا کہ پاکستان میں موسمیاتی تبدیلیوں اور اس سے پیدا شدہ صورتحال نگران وزیر اعظم کے ایجنڈے میں سر فہرست رہے گا، موسمایاتی تبدیلیوں کے پاکستان میں اثرات سرخ لائن عبور کر چکے ہیں۔

منیر اکرم نے کہا تھا کہ پاکستان میں گزشتہ سال سیلاب کی تباہ کاریوں کے حوالے سے جنیوا میں ڈونرز کانفرینس کے حوالے سے سیکریٹری جنرل سے نگران وزیراعظم خصوصی ملاقات کریں گے۔

انکا کہنا تھا کہ جنیوا ڈونرز کانفرینس میں چھ اعشاریہ دو ارب ڈالر کے مالی پیکج کا اعلان کیا گیا تھا، ڈونرز ممالک پراجیکٹس کی بنیاد پر رقوم فراہم کریں گے۔

پاکستانی سفیر نے کہا تھا کہ پاکستان میں متعلقہ ادارے اس حوالے سے بحالی کے مختلف منصوبوں پہ ابتدائی کام مکمل کر چکے ہیں۔ نگران وزیراعظم اقوام متحدہ میں اپنی تقریر میں مسئلہ کشمیر، اسلامو فوبیا اور خطہ میں امن و امان سے ممبر ممالک کو آگاہی دیں گے۔

انہوں نے کہا کہ نگران وزیراعظم انوارالحق کاکڑ سے ورلڈ بینک اور آئی ایم ایف کی سربراہان کی ملاقاتیں بھی متوقع ہیں جبکہ نگران وزیراعظم امریکی صدر بائیڈن کے نیویارک میں خصوصی عشائیہ میں شریک ہوں گے۔

منیر اکرم نے مزید کہا تھا کہ نگران وزیراعظم کے ہمراہ وزیر خارجہ پاکستان جلیل عباس جیلانی وزیر خزانہ شمشاد اختر اور وزیر صحت دورہ میں ہمراہ ہوں گے جبکہ انوارالحق کاکڑ کمرشل فلائٹ کے ذریعے پاکستان سے نیویارک پہنچیں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں