پرویز خٹک نے کہا ہے کہ قرضے واپس کرنے کے لئے ہمارے پاس وسائل نہیں۔

 تفصیلات کے مطابق پی ٹی آئی پارلیمنٹرین کے چیئرمین پرویز خٹک نے میڈیا سے گفتگو کرتے ہوئے کہا کہ ہمارے لوگوں کو اگر چائنیز سمجھ آجائے تو کئی جگہوں پر ایڈجسٹ ہوسکتے ہیں، چین کیساتھ ہمارے دور میں تعلقات بالکل بھی خراب نہیں تھے، ہمارے دور میں افواہیں پھیلائی گئیں جبکہ سی پیک سے پاکستان میں ترقی ہوگی۔

 انہوں نے کہا کہ قرضے واپس کرنے کے لئے ہمارے پاس وسائل نہیں جبکہ نہ کوئی ٹیکس دیتا ہے اور نہ ٹیکس وصولی کا کوئی طریقہ کار ہے جبکہ انڈسٹری کو اگر ٹیکس فری کردیں تو باہر سے ڈالر آنا شروع ہوجائینگے۔

پرویز خٹک نے یہ بھی کہا کہ چیئرمین پی ٹی آئی کو کبھی بدنام نہیں کیا اور نہ کرونگا، میں پالیسی کی بات کرتا ہوں جبکہ میں کئی سالوں سے سوچتا رہا کہ ملک کیلئے کچھ کروں

ان کا کہنا تھا کہ لوگ یہاں سبز باغ دیکھاتے ہیں، جب حکومت میں آتے ہیں تو کچھ نہیں ہوتا ، میں جھوٹے وعدے نہیں کرونگا جو کرسکتا ہوں اسی کا وعدہ کرونگا۔

پرویز خٹک کا یہ بھی کہنا تھا کہ آئین و قانون کے مطابق لگ رہا ہے کہ الیکشن فروری میں ہونگے لیکن اگر کوئی پارٹی عدالت چلی گئی تو پھر تاخیر کا شکار ہوسکتے ہیں۔

پی ٹی آئی پارلیمنٹرین کے چیئرمین پرویز خٹک کا مزید کہنا تھا کہ توشہ خانہ سے کوئی چیز لانا جرم نہیں لیکن جو لایا اسکو دیکھانا لازمی ہے، بی آر ٹی دنیا کی ٹاپ تین سروسز میں شامل ہے،لوگوں کی سہولت کیلئے بی آر ٹی خسارے میں ہے۔