مشعال ملک نے کہا ہے کہ سید علی گیلانی کی زندگی ہمارے لیے مشعل راہ ہے۔

تفصیلات کے مطابق حریت رہنما یاسین ملک کی اہلیہ مشعال ملک نے سید علی گیلانی کی دوسری برسی کے موقع پر کشمیر ہاؤس میں کانفرنس سے خطاب کرتے ہوئے کہا کہ شہیدوں کی قربانیاں جاری ہیں جو جاری ہیں، بھارتی عزائم کو سید علی گیلانی نے بہت پہلے افشاں کردیا تھا،ہم اپنا مقدمہ بھر پور انداز میں اقوام عالم کے سامنے رکھیں گے۔

مشعال ملک نے کہا کہ  سید علی گیلانی کے ساتھ میرا رشتہ باپ بیٹی کا تھا ان کی  زندگی ہمارے لیے مشعل راہ ہے۔

انہوں نے یہ بھی کہا کہ  سید علی گیلانی کے زندگی میں بہت سے چیلنجز آئے وہ ہمیشہ چٹان کی طرح ڈٹ کر کھڑے رہے، سید گیلانی نے کشمیریوں کا مقدمہ اقوام عالم کے سامنے رکھا۔

حریت رہنما یاسین ملک کی اہلیہ مشعال ملک نے مزید کہا کہ سید علی گیلانی جیسے لیڈر صدیوں بعد پیدا ہوتے ہیں،آج بھی کئی کشمیری رہنما جیلوں میں نظربند ہیں، کشمیری نظریے کو کوئی بھی نہیں دفنا سکتا۔

کانفرنس سے خطاب کرتے ہوئے صدر ریاست آزاد جموں کشمیر بیرسٹر سلطان محمود چوہدری کا کہنا تھا کہ ہمیں علی گیلانی کے مشن کو آگے لے کر چلنا ہے، کشمیری صرف یہ چاہتے ہیں کہ اقوام متحدہ کی قراردادوں پر عمل کیا جائے سید علی گیلانی عرص دراز تک نذر بند رہے ان کی قربانیوں کو سلام پیش کرتے ہیں۔

اس موقع پر پیپلز پارٹی کے رہنما نیئر بخاری ، عبدالحمید لون ، راجہ فاروق حیدر سمیت  دیگر مقررین نےسید علی گیلانی کو خراجِ تحسین پیش کیا۔