پنجاب میں خوفناک ٹریفک حادثے میں 5 مسافر جاں بحق اور 50 سے زائد زخمی ہو گئے ہیں۔

تفصیلات کے مطابق پنجاب کے ضلع شیخوپورہ میں ایم 2 موٹروے نزد خانقاہ ڈوگراں انٹرچینج زائرین کی بس الٹ گئی جس کے نتیجے میں 5 افراد جاں بحق اور 50 سے زائد زائرین زخمی ہوگئے۔

ریسکیو حکام نے بتایا کہ میلہ مریم آباد زائرین کی بس موٹروے پر تیز رفتاری اور اوور لوڈنگ کی وجہ سے الٹ گئی۔

حکام کا کہنا تھا کہ اطلاع موصول ہوتے ہی ریسکیو کنٹرول نے فوراً ایمرجنسی گاڑیاں روانہ کیں اور ریسکیو 1122 کی امدادی ٹیموں نے فوراً کارروائی کر کے زخمی ہونے والے افراد کو فرسٹ ایڈ فراہم کرنے کے بعد اسپتال شفٹ کرنا شروع کر دیا۔

ریسکیو حکام نے مزید بتایا کہ ڈسٹرکٹ ایمرجنسی آفیسر انجینئر رانا اعجاز احمد ریسکیو آپریشن کی کمانڈ کر رہے ہیں جبکہ ریسکیو آپریشن جاری ہے۔

اسپیکر قومی اسمبلی کا اظہار افسوس

اسپیکر قومی اسمبلی راجہ پرویز اشرف نے ضلع شیخوپورہ کے علاقے صفدر آباد میں مسافر بس کو پیش آنے والے حادثے پر افسوس کا اظہار کرتے ہوئے کہا کہ قیمتی انسانی جانوں کے نقصان پر دل افسردہ ہے۔

اسپیکر نے حادثے میں قیمتی انسانی جانوں کے نقصان اور پچاس افراد سے زائد کے زخمی ہونے کی اطلاعات پر گہرے دکھ اور افسوس کا اظہار کیا اور کہا کہ انسانی جانوں کے نقصان پر لواحقین سے تعزیت کا اظہار کرتا ہوں۔

راجہ پرویز اشرف نے متعلقہ حکام کو زخمیوں کو فوری طبی امداد فراہم کرنے پر زور دیا اور کہا کہ مشکل کی اس گھڑی میں غمزدہ خاندانوں کے غم میں برابر کے شریک ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں