اسپیکر قومی اسمبلی راجہ پرویز اشرف نے کہا ہے کہ پاکستان میں اقلیتوں کو مکمل مذہبی آزادی حاصل ہے۔

تفصیلات کے مطابق اسپیکر قومی اسمبلی راجہ پرویز اشرف نے ختم نبوت کے معاملے پر پارلیمان سے آئینی ترمیم کی منظوری کے حوالے سے پیغام دیتے ہوئے کہا کہ 7 ستمبر کا دن ایک تاریخ ساز دن ہے، آج کے دن 1974 میں عقیدہ ختم نبوت سے متعلق متفقہ آئینی ترمیم منظور کی گئی، متفقہ آئینی ترمیم کی منظوری کا کریڈٹ شہید ذوالفقار علی بھٹو اور اس وقت کے سیاسی اکابرین و زعماء کو جاتا ہے۔

اسپیکر قومی اسمبلی نے کہا کہ اس آئینی ترمیم کے ذریعے عقیدہ ختم نبوت پر ایمان نا رکھنے والوں کو غیر مسلم قرار دیا گیا، ختم نبوت کا عقیدہ اسلام کی اساس اور مسلمانوں میں وحدتِ اْمت کی علامت ہے،  آپﷺ سلسلہ نبوت کی آخری کڑی ہیں اور ہر مسلمان کے ایمان کا بنیادی جزو ہے، آپﷺ کے بعد کوئی شخص اس منصب پر فائز نہیں ہو گا، قرآن مجید میں ختم نبوت کے واضح احکامات ہیں کہ آپﷺ  اللہ کے رسول اور آخری نبی ہیں۔

راجہ پرویز اشرف نے کہا کہ پاکستان میں اقلیتوں کو مکمل مذہبی آزادی حاصل ہے، اسلام تمام مذاہبِ کے ماننے والوں کا احترام کرنے کی تلقین کرتا ہے اور ان کے عقیدے کے مطابق انہیں اپنے مذہبی رسومات منانے کی اجازت دیتا ہے، آئین پاکستان میں اقلیتوں کو اپنے رسم و رواج کے مطابق زندگی بسر کرنے کی مکمل آزادی حاصل ہے۔

ان کا کہنا تھا کہ مغرب میں توہین قرآن ورسالت کے واقعات انتہائی تکلیف دہ ہیں، ان واقعات سے مسلمانوں کے مذہبی جذبات اور احساسات کو مجروح کیا جا رہا ہے، باقی مذاہبِ کے ماننے والوں پر لازم ہے کہ مسلمانوں کے جذبات اور احساسات کا احترام کریں، آزادی اظہار رائے کا یہ مطلب نہیں ہے کہ دوسروں کے مذہب کا مذاق اڑایا جائے اور ان کے جذبات اور احساسات کو مجروح کیا جائے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں