مسلم لیگ ن کے رہنما عرفان صدیقی نے کہا ہے کہ نواز شریف آج بھی پارلیمنٹ کی بالا دستی چاہتے ہیں۔

تفصیلات کے مطابق مسلم لیگ ن کے رہنما عرفان صدیقی نے اپنے ایک بیان میں کہا کہ نواز شریف کل سعودی عرب روانہ ہوں گے، نواز شریف چین یا قطر کا دورہ نہیں کر رہے، وطن واپسی سے پہلے دو دن کے لئے متحدہ عرب امارات جائیں گے، سعودی عرب میں شاہی خاندان سے ملاقاتوں جیسی مصروفیات میرے علم میں نہیں ہیں، نواز شریف عمرہ ادا کریں گے، کچھ وقت اپنے بیٹے حسین کے ساتھ گزاریں گے اور زیادہ وقت ان کا مدینہ منورہ میں گزرے گا۔

انہوں نے کہا کہ نواز شریف یو اے ای سے 21 اکتوبر کو پاکستان روانہ ہو جائیں گے، نواز شریف کی تقریر عام لیڈر کی نہیں سیاسی مدبر کی ہوگی۔

ان کا کہنا تھا کہ نواز شریف کے رابطے بہت سے ممالک سے ہیں جن میں دوست ممالک خاص طور پر شامل ہیں، کچھ غیر رسمی رابطے رہے ہیں اور کچھ رسمی رابطے بھی ہیں، دوست ممالک سے پاکستان میں سرمایہ کاری کے حوالے سے بھی بات چیت ہوئی ہے۔

 مسلم لیگ ن کے رہنما عرفان صدیقی نے مزید کہا کہ ووٹ کو عزت دو کا مطلب یہ ہے کہ پارلیمنٹ کو عزت دو، پارلیمنٹ کی بالا دستی کو تسلیم کرو اور عوام کا حق رائے دہی تسلیم کرو، نواز شریف ان اصولوں پر سختی سے قائم ہیں، نواز شریف آج بھی پارلیمنٹ کی بالا دستی چاہتے ہیں۔

دوسری جانب مسلم لیگ (ن) کے قائد نواز  شریف کی وطن واپسی کےلیے دبئی سے اسپیشل طیارہ بُک  کرائے جانے کی بھی تصدیق ہوگئی ہے۔

ذرائع کا کہنا ہے کہ نواز شریف جس خصوصی پرواز سے پاکستان پہنچیں گے اسے ’امید پاکستان‘ کا نام دیا جائے گا اور اس اسپیشل فلائٹ میں تقریباً 150 افراد کی گنجائش ہے۔

ذرائع کا کہنا ہےکہ نواز شریف عمرے کی ادائیگی کیلئے کل لندن سے سعودی عرب روانہ ہوں گے جہاں تقریباً ایک ہفتہ قیام کے دوران وہ سعودی اعلیٰ حکام سے ملاقاتیں کریں گے جب کہ سابق وزیراعظم سعودی عرب کا دورہ مکمل کرکے 17 یا 18 اکتوبر کو دبئی پہنچیں گے۔

ذرائع کے مطابق نواز شریف کی دبئی میں بھی کئی ملاقاتیں طے ہیں، وہ دبئی میں 3 دن قیام کے بعد 21 اکتوبر لاہور کیلئے روانہ ہوں گے۔

ذرائع کا کہنا ہے کہ نواز شریف 21 اکتوبر کو پاکستان جانے کیلئے دبئی سے لیگی کارکنوں اور صحافیوں کے ساتھ روانہ ہوں گے،  خصوصی پرواز دبئی سے اسلام آباد پہنچ کر آدھے گھنٹے بعد لاہور کیلئے اڑان بھرے گی جہاں سابق وزیراعظم مینار پاکستان پر جلسے سے خطاب کریں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں