نگراں وفاقی وزیر اطلاعات مرتضیٰ سولنگی نے کہا ہے کہ نگراں حکومت منصفانہ، آزادانہ اور شفاف انتخابات کے بروقت انعقاد کیلئے پرعزم ہے۔

تفصیلات کے مطابق نگراں وفاقی وزیر اطلاعات مرتضیٰ سولنگی سے جمعیت علمائے اسلام کے سربراہ مولانا فضل الرحمان کی ملاقات ہوئی جس میں ملاقات میں ملکی مجموعی سیاسی صورتحال سمیت آئندہ انتخابات کے امور پر تبادلہ خیال کیا گیا۔

 نگراں وفاقی وزیر اطلاعات مرتضیٰ سولنگی نے کہا کہ نگراں حکومت آزادانہ، منصفانہ اور شفاف انتخابات کے بروقت انعقاد کے لئے پرعزم ہے، نگراں حکومت کی ذمہ داری ہے کہ تمام سیاسی جماعتوں کو انتخابات میں حصہ لینے کے لئے یکساں مواقع فراہم کرے، الیکشن کمیشن آزاد اور خودمختار ادارہ ہے، ہم خوشگوار اور پرامن ماحول میں انتخابات کا انعقاد ممکن بنانا چاہتے ہیں۔

اس موقع پر نگراں وفاقی وزیر اطلاعات مرتضیٰ سولنگی نے مولانا فضل الرحمان کی خوش دامن کے انتقال پر تعزیت کا اظہار کیا اور فاتحہ خوانی کی۔

 مولانا فضل الرحمان نے نگراں حکومت کے معاشی مسائل کے حل کے لئے اقدامات کو سراہا اور انتخابی عمل میں اپنے ہر ممکن تعاون کا یقین دلایا۔

مولانا فضل الرحمن سے سابق صدر آصف علی زرداری کی اہم ملاقات

گزشتہ شب سابق صدر آصف علی زرداری اسلام آباد میں جمیعت علمائے اسلام کے سربراہ مولانا فضل الرحمان کی رہائش گاہ پہنچے جہاں دونوں رہنماؤں کے درمیان ملاقات ہوئی، ملاقات 50 منٹس تک جاری رہی۔

ملاقات میں دونوں رہنماؤں کے درمیان ملکی سیاسی صورتحال اور آئندہ عام انتخابات کے امکانات پر بات چیت ہوئی جبکہ ملاقات میں نوازشریف کی وطن واپسی اور سندھ میں پی پی پی مخالف سیاسی اتحاد پر بھی گفتگو کی گئی۔

ملاقات میں آصف علی زرادی نے مولانا فضل الرحمن سے ان کی خوشدامن کی وفات پر اظہار تعزیت بھی کی جس میں دونوں رہنماؤں کے درمیان مستقبل کے سیاسی منظرنامہ بارے اہم مشاورت ہوئی۔

ملاقات میں مولانا عبدالغفور حیدری بھی شریک تھے جبکہ پیپلزپارٹی کی جانب سے سابق صدرکے ہمراہ ڈاکٹر عاصم اور رخسانہ زبیری بھی موجود تھے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔