اسرائیل کی جانب سے نہتے فلسطینیوں پر وحشیانہ بمباری کے خلاف پاکستان سمیت دنیا بھر میں شدید احتجاجی مظاہروں کا سلسلہ جاری ہے۔

تفصیلات کے مطابق پاکستان سمیت دنیا بھر میں لاکھوں افراد نے فلسطینی عوام کے ساتھ اظہار یکجہتی اور غزہ پر اسرائیلی جارحیت کی مذمت کرتے ہوئے احتجاجی مظاہرے کیے۔

فلسطین سے اظہار یکجہتی کے لئے ملک کے مختلف شہروں کراچی، لاہور، بورے والا، بلوچستان، ٹنڈو الہ یار سمیت اسلام آباد میں مظاہرین نے اسرائیلی جارحیت کیخلاف احتجاجی ریلی نکالی اور نعرے بازی بھی کی۔

مظاہرین نے فلسطین کی حمایت میں نعرے لگائے اور فلسطینی علاقوں پر اسرائیلی قبضہ ختم کرنے کا بھی مطالبہ کیا۔

دوسری جانب دسیوں ہزار لوگ وسطی لندن میں فلسطینی عوام کے ساتھ اظہار یکجہتی کے لیے سڑکوں پر نکل آئے، جنہیں اس وقت اسرائیل کی نسل کشی کی جارحیت کا سامنا ہے۔

اٹلی کے دارالحکومت روم کے ویٹوریو اسکوائر اور میلان شہر میں بھی ہزاروں افراد نے فلسطینی عوام کے ساتھ اظہار یکجہتی کیلئے احتجاجی مظاہرہ کیا۔

فلسطینی عوام کی حمایت اور غزہ پر اسرائیلی جارحیت کے خلاف ہزاروں مظاہرین نے ڈبلن شہر میں بھی مارچ کیا۔

اس کے علاوہ دیگر فلسطینی حامی ریلیاں سڈنی، واشنگٹن، ڈی سی، عمان، بیروت اور مراکش، ترکی، ملائیشیا اور بنگلہ دیش سمیت مسلم اکثریتی ممالک میں بھی ہوئی ہیں۔

واضح رہے کہ اسرائیلی وحشیانہ کارروائیوں میں فلسطین کے غزہ سمیت دیگر علاقوں میں شہید ہونے والے فلسطینیوں کی تعداد 4 ہزار سے تجاوز کر گئی ہے، جس میں بڑی تعداد میں بچے بھی شامل ہیں۔

رپورٹس کے مطابق حماس کے الاقصی فلڈ آپریشن کے بعد سے اب تک اسرائیلی طیاروں کی بمباری سے غزہ اور دیگر علاقوں میں عمارتیں کھنڈر بن چکی ہیں۔

اسرائیل کی 7 اکتوبر سے جاری بربریت کی میڈیا کوریج پر اسرائیلی حکومت تلملا اُٹھی ہے اور دنیا کے سامنے سچ دکھانے کی پاداش میں متعدد فلسطینی اور عرب اور دیگر غیر ملکی نشریاتی اداروں کو بند کرنے کی دھمکی بھی دے ڈالی ہے۔

رپورٹس کے مطابق 7 اکتوبر سے اب تک صہیونی افواج کی وحشیانہ کارروائیوں میں اب تک 4 ہزار سے زائد فلسطینی اپنی جانوں کا نذرانہ دے چکے ہیں۔

غیر جانبدار صحافیوں کی غزہ سے موصول ہونے والی چشم کشا خبروں کے مطابق اسرائیلی حملوں میں 1400 سے زائد بچے اور 1600 سے زائد خواتین بھی شہید ہو چکی ہیں۔

بعدازاں عالمی خبر رساں ادارے نے خبردار کیا ہے کہ غزہ میں فوری طور پر امداد کے راستے نہیں کھولے گئے تو انسانی بحران جنم لے سکتا ہے۔

عالمی خبر رساں ادارے کی رپورٹس کے مطابق غزہ میں لاکھوں افراد پانی، خوراک اور بجلی سے محروم ہیں اور اسرائیل نے غزہ کو امداد فراہم کرنے والی مصری گزر گاہ بند کر رکھی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔