نگران وزیر اعلیٰ بلوچستان علی مردان خان ڈومکی نے کہا ہے کہ سرکاری ملازمت کے حصول کیلئے عمر کی بالائی حد میں کمی کا حتمی فیصلہ نہیں کیا گیا۔

سماجی رابطے کی ویب سائٹ ٹوئٹر پر اپنے ایک پیغام میں نگران وزیر اعلیٰ بلوچستان علی مردان خان ڈومکی نے کہا کہ سرکاری ملازمت والا معاملہ کابینہ کے آئندہ اجلاس میں مزید غور کے لئے رکھا گیا ہے۔

میر علی مردان خان ڈومکی نے کہا کہ بلوچستان کابینہ کے گزشتہ اجلاس میں محکمہ سروسز اینڈ جنرل ایڈمنسٹریشن ڈیپارٹمنٹ کی جانب سے یہ ایجنڈہ پوائنٹ پیش کیا گیا تھا، نگران کابینہ نے اس معاملے پر تمام پہلوؤں کا جائزہ لیا تھا، کابینہ اراکین اور متعلقہ محکمے نے رائے پیش کی تھی۔

انہوں نے مزید کہا کہ بلوچستان نگران کابینہ کے آئندہ اجلاس میں اس معاملے پر مزید غور کیا جائے گا۔

واضح رہے کہ کچھ دن قبل نگران وزیر اعلیٰ بلوچستان علی مردان ڈومکی کی زیر صدارت نگران صوبائی کابینہ کا تیسرا اجلاس ہوا جس میں نگران کابینہ نے رائٹ ٹو انفارمیشن رولز 2022، قومی تعلیمی نصاب فیز ٹو، ضلع نصیر آباد کی تحصیل لانڈھی میں نئے پولیس اسٹیشن کے قیام کی منظوری دی۔

اجلاس میں بلوچستان کابینہ نے سرکاری ملازمت کے لیے عمر کی بالائی حد 35 سال مقرر کر دی۔

اس موقع پر کابینہ نے سیل ٹیکس آن سروسز سے متعلق امور نمٹانے کے لئے کیسکو اور بلوچستان ریونیو اتھارٹی کو باہمی مشاورت سے تجاویز مرتب کرنے کی ہدایت کر دی۔

دوسری جانب نگراں وزیرِ اعظم  انوار الحق کاکڑ سے سابق وزیرِ اعلیٰ بلوچستان ڈاکٹر عبدالمالک کی قیادت میں بلوچستان کے وفد نے ملاقات کی۔

ملاقات میں بلوچستان کے مسائل اور ان کے حل کیلئے وزیرِ اعظم کی قیادت میں اٹھائے گئے اقدامات پر گفتگو کی گئی۔

ملاقات میں خصوصی سرمایہ کاری سہولت کونسل کے تحت بلوچستان کے کان کنی کے شعبے میں بیرونی سرمایہ کاری کو خوش آئند قرار دیا گیا۔

ڈاکٹر عبدالمالک نے وزیرِاعظم کو بلوچستان کی ترقی کیلئے ترجیحی اقدامات پر خراج تحسین پیش کیا۔