استحکام پاکستان پارٹی کی مرکزی سیکرٹری اطلاعات ڈاکٹر فردوس عاشق اعوان نے کہا ہے کہ چیئرمین پی ٹی آئی کی سربراہی میں 9 مئی سانحہ ملک دشمن سازش سے کم نہیں ہے۔

تفصیلات کے مطابق سپریم کورٹ کے فوجی عدالتوں میں سویلینز کا ٹرائل کالعدم قرار دینے کے فیصلے پر استحکام پاکستان پارٹی کی مرکزی سیکرٹری اطلاعات ڈاکٹر فردوس عاشق اعوان نے رد عمل دیتے ہوئے کہا کہ سپریم کورٹ کا فوجی عدالتوں میں سویلینز کے ٹرائل کو کالعدم قرار دینا وقت کی اہم ضرورت کے منافی ہے، یہ فیصلہ قومی سلامتی اور قومی مفادات کے برعکس ہے جو ملک دشمن عناصر کو تقویت دے گا۔

انہوں نے کہا کہ ملک دشمن عناصر اور غیر ملکی ایجنڈوں پر کام کرنے والوں سے آڑے ہاتھوں نمٹنا ضروری ہے، ماضی میں ایسا قانون نہ ہونے کی وجہ سے غیر ملکی ایجنٹوں کے خلاف مضبوط فیصلے نہ کئے جا سکے۔

ان کا کہنا تھا کہ پی ٹی آئی چیئرمین کی سربراہی میں 9 مئی کا سانحہ ملک دشمن سازش سے کم نہیں ہے، اس انتشار کے تمام کردار سخت سے سخت سزا کے مستحق ہیں جو ملٹری کورٹس کے علاوہ ممکن نہیں۔

فردوس عاشق اعوان نے کہا کہ پی ٹی آئی چیئرمین کو سزا سے بچانے کے لئے ملکی مفاد کو داو پر نہیں لگایا جا سکتا، نو مئی کے واقعہ کی وجہ سے بننے والے مقدمات غیر معمولی نوعیت کے حامل ہیں، فوجی تنصیبات پر حملہ آوروں کا ٹرائل فوجی عدالتوں میں زیادہ بہتر اور مؤثر ہو سکتا ہے، اس فیصلے سے نو مئی کے واقعہ کے ذمہ داروں کو کیفر کردار تک پہنچانا مشکل ہو جائے گا، جو جرائم دفاعی اعتبار سے حساسیت کے حامل ہیں ان کا ٹرائل فوجی عدالتوں میں ہی ہونا چاہیئے۔

استحکام پاکستان پارٹی کی مرکزی سیکرٹری اطلاعات ڈاکٹر فردوس عاشق اعوان نے مزید کہا کہ ملکی سالمیت سے آگے نہ کوئی فرد ہے اور نہ ہی اس پہ لگنے والی فرد جرم ہے، جس فرد کو ملک کا درد  نہیں ملک کا قانون بھی اس کا ہمدرد نہیں بن سکتا۔

واضح رہے کہ سپریم کورٹ آف پاکستان نے فوجی عدالتوں میں سویلین کے ٹرائل کے خلاف کیس کا فیصلہ سناتے ہوئے فوجی عدالتوں میں سویلینز کے ٹرائل کو غیر آئینی قرار دے دیا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔