حکومت سندھ نے غیر قانونی مقیم تارکین وطن نکالنے کے انتظامات کو حتمی شکل دے دی ہے۔

تفصیلات کے مطابق غیر قانونی تارکین وطن کو ملک بدر کرنے کے لیے ڈسٹرکٹ کیماڑی میں کیمپ قائم کر دیا گیا ہے، یکم نومبر سے کارروائیاں شروع ہوں گی۔

حاجی کیمپ سے کوچز کے ذریعے غیر قانونی تارکین وطن کو جیکب آباد بھیجا جائے گا جہاں سے افغانیوں کو چمن بارڈر بھیجا جائے گا۔

سندھ حکومت نے غیر قانونی مقیم تارکین وطن کے انخلاء کے عمل کی نگرانی کے لئے کنٹرول روم قائم کر دیا ہے جو محکمہ داخلہ سندھ کے دفتر میں قائم کیا گیا ہے، کراچی سمیت صوبے بھر میں غیر قانونی مقیم مہاجرین کے انخلاء کی نگرانی کنٹرول روم سے ہو گی۔

31 اکتوبر سے 3 نومبر تک کنٹرول روم 24 گھنٹے فعال رہے گا جہاں افسران کی ڈیوٹی لگا دی گئی ہے۔

یاد رہے کہ پاکستان نے ہمیشہ ایک ہمدرد اور ذمہ دار ہمسائے کا کردار ادا کیا ہے جس کی دنیا میں کوئی مثال نہیں ملتی، پاکستان کئی دہائیوں سے افغانستان کے جنگی متاثرین کو اپنے ملک میں پناہ دیے ہوئے ہیں۔

پاکستان میں دہشت گردی، منشیات، کلیشنکوف کلچر، اسمگلنگ جیسے بے شمار جرائم افغان پناہ گزینون کی وجہ سے پیدا ہوئے ہیں جس کے پیش نظر  حکومت پاکستان  نے غیر قانونی شہریوں کو پاکستان چھوڑنے کے لئے 31 اکتوبر کی ڈیڈ لائن دی ہے۔

حکومت پاکستان اور عسکری قیادت نے پاکستان کی سالمیت کے پیش نظر ان جرائم کو ختم کرنے کا اٹل فیصلہ کرلیا ہے، تاہم  حکومتی احکامات کے پیشِ نظر طورخم اور چمن بارڈر سے روزانہ ہزاروں افغان باشندے اپنے وطن واپس جا رہے ہیں۔

افغان مہاجرین نے وطن واپسی پر اظہار خیال کرتے ہوئے کہا کہ ہم پاکستان کا تہہ دل سے شکریہ ادا کرتے ہیں جنہوں نے چالیس سال تک ہمیں پناہ دی، “جب ہمارے ملک میں جنگ چل رہی تھی تب ہم پاکستان آئے اور یہاں ہمیں بھائیوں کی طرح رکھا گیا۔

افغان مہاجرین کا کہنا تھا کہ ہم شکریہ ادا کرتے ہیں کہ ہمارا اتنا خیال رکھا گیا اور آج باعزت اپنے ملک واپس جارہے ہیں، ہم اپی خوشی اور زضامندی سے اپنے ملک واپس جارہے ہیں اور دعاگو ہیں کہ پاکستان ہمیشہ خوشحال رہے، ہمارے ساتھ کوئی زبردستی نہیں ہوئی اور ہم اپنی مرضی سے افغانستان واپس جارہے ہیں کیونکہ ہمارے پاس کوئی دستاویزات نہیں تھے۔

افغان باشندوں کی رضاکارانہ طور پر اپنے وطن واپسی کا اقدام قابلِ ستائش ہے، افغان باشندوں کی افغانستان واپسی کا عمل دونوں ممالک کے حق میں مثبت نتائج مرتب کرے گا۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں