اسلام آباد چیمبر آف کامرس اینڈ انڈسٹری کے قائم مقام صدر فاد وحید نے کہا ہے کہ معیشت کی بہتری کیلئے حکومت افرادی قوت کی برآمدات کو فروغ دینے پر خصوصی توجہ دے۔

تفصیلات کے مطابق اسلام آباد چیمبر آف کامرس اینڈ انڈسٹری کے قائم مقام صدر فاد وحید نے وزیراعظم کے معاون خصوصی برائے اوورسیز پاکستانیز اور ہیومین ریسورس ڈویلپمنٹ محمد جواد سہراب ملک سے ملاقات جس می  پاکستان اوورسیز ایمپلائمنٹ پروموٹرز ایسوسی ایشن کے چیئرمین اسد حفیظ کیانی، وائس چیئرمین شکیل احمد عباسی اور سابق سینئر وائس چیئرمین فہیم اقبال چوہدری بھی موجود تھے۔

اس موقع پر اسلام آباد چیمبر آف کامرس اینڈ انڈسٹری کے قائم مقام صدر فاد وحید نے کہا کہ پاکستان آبادی کے لحاظ سے دنیا کا پانچواں بڑا ملک ہے جس کے پاس انسانی وسائل کا ایک بڑا ذخیرہ موجود ہے اور اس بات پر زور دیا کہ حکومت اپنی افرادی قوت کو جدید ترین ہنر اور علم سے آراستہ کرے تاکہ دنیا بھر کے ممالک میں ان کی برآمدات کے امکانات کو بہتر بنایا جا سکے۔

انہوں نے کہا کہ بنگلہ دیش نے جون 2023 کو ختم ہونے والے سال کے دوران 11لاکھ سے زائد ورکرز باہر بھیجے لیکن پاکستان نے جولائی 22سے مئی23کے دوران 11 ماہ کے عرصے میں صرف 3لاکھ 72ہزار افراد باہر بھیجے جو صلاحیت سے بہت کم ہیں۔

ان کا کہنا تھا کہ مشرق وسطیٰ، یورپ اور جنوب مشرقی ایشیا سمیت متعدد ممالک میں ہنر مند افراد کی بہت زیادہ مانگ پائی جاتی ہے لٰہذا حکومت کو چاہیے کہ وہ اپنی افرادی قوت کو ان ممالک کی مطلوبہ ضرورت کے مطابق ہنر فراہم کرے جس سے ہماری افرادی قوت کی برآمدات میں اضافہ ہو گا اور معیشت جلد بہتری کی طرف گامزن ہو گی۔

وزیراعظم کے معاون خصوصی برائے اوورسیز پاکستانیز اور ہیومین ریسورس ڈویلپمنٹ محمد جواد سہراب ملک نے اپنے خطاب میں کہا کہ حکومت معیشت کی جلد بحالی کے ہدف کو حاصل کرنے کے لیے پاکستان کی افرادی قوت کی صلاحیت کو بروئے کار لانے کے لیے پرعزم ہے۔

 انہوں نے کہا کہ سعودی سفیر کے ساتھ حالیہ ملاقات کے دوران انہوں نے سعودی عرب کو سعودی ویژن 2030 کے حصول کے لیے خاطر خواہ تعداد میں پاکستانی کارکنوں کو ملازمت دینے کی تجویز دی ہے۔

ان کا کہنا تھا کہ حکومت تمام سٹیک ہولڈرز کی مشاورت سے پاکستان کی افرادی قوت کی برآمدات کو زیادہ سے زیادہ بڑھانے کیلئے تمام ممکنہ کوششیں کرے گی۔

پاکستان اوورسیز ایمپلائمنٹ پروموٹرز ایسوسی ایشن کے چیئرمین اسد حفیظ کیانی، وائس چیئرمین شکیل احمد عباسی اور سابق سینئر وائس چیئرمین فہیم اقبال چوہدری نے بھی اپنے خیالات کا اظہار کیا اور دنیا بھر میں پاکستانیوں کے لیے روزگار کے نئے مواقع پیدا کرنے کے لیے حکومت کے ساتھ بھرپور تعاون کی یقین دہانی کرائی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں