لاہور: نگران وزیراعظم انوارالحق کاکڑ نے کہا ہے کہ کسی سیاسی جماعت پر پابندی لگانا نگران حکومت کا مینڈیٹ نہیں۔

نگران وزیراعظم انوارالحق کاکڑ نے لاہور میں میڈیا سے گفتگو کرتے ہوئے کہا کہ الیکشن کی تاریخ دینا الیکشن کمیشن کا کام ہے، ہم تو یہ کہہ سکتے ہیں بتائیں الیکشن کب کروارہے ہیں، ہم جارہے ہیں چاہے2 گھنٹے میں جائیں یا 2 دن میں جائیں۔

انہوں نے کہا کہ پی ٹی آئی کے وفادار لوگ بھی الیکشن میں حصہ لے سکتے ہیں، پی ٹی آئی پر الیکشن لڑنے کی کوئی پابندی نہیں، کسی سیاسی جماعت پر پابندی لگانا نگران حکومت کا مینڈیٹ نہیں۔

انوارالحق کاکڑ نے کہا کہ حلقہ بندیوں سے متعلق الیکشن کمیشن کا مخصوص طریقہ کار ہے، انتخابات سے متعلق الیکشن کمیشن کو ہر قسم کی معاونت فراہم کریں گے۔

انکا کہنا تھا کہ ووٹ کاسٹ کرنے کے لئے جتنے بے چین آپ ہیں اتنا میں بھی ہوں، ہم بھی چاہتے ہیں ملک میں مستقل حکومت آئے۔

نگران وزیراعظم نے کہا کہ غزہ کی صورتحال انسانی المیہ کو جنم دے رہی ہے، غزہ کی صورتحال قابل مذمت ہے، غزہ کے موجودہ بحران میں فوری جنگ بندی ہونی چاہیے، چین کے حالیہ دورے میں عالمی رہنماؤں سے غزہ کی صورتحال پر گفتگو ہوئی۔

انہوں نے کہا کہ کوئی بھی ملک غیرقانونی مقیم افراد کو رہنے کی اجازت نہیں دیتا، بغیر دستاویزات کے رہنے والوں کو واپس بھیجا جارہا ہے، رجسٹرڈ افغان مہاجرین کو واپس نہیں بھیج رہے۔

انوارالحق کاکڑ نے کہا کہ بغیر دستاویزات کے رہنے والوں کی سسٹم میں جگہ نہیں، غیرقانونی مقیم افراد اپنے ممالک جائیں، غیرقانونی مقیم افراد اپنے ملک سے ویزا لگوا کر واپس آسکتے ہیں۔

نگران وزیر اعظم نے مزید کہا کہ پنجاب کے بہت سے منصوبوں سے متعلق آگاہی حاصل ہوئی، پنجاب حکومت کو جہاں ضرورت ہوگی تعاون کریں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں