اسلام آباد: صدر مملکت ڈاکٹر عارف علوی نے فلسطین اور اسرائیل میں بڑھتے ہوئے تشدد پر تشویش کا اظہار کرتے ہوئے کہا ہے کہ صورتحال فوری جنگ بندی کا مطالبہ کرتی ہے۔

صدر عارف علوی نے اپنے جاری کردہ بیان میں کہا کہ فلسطین اور اسرائیل کے درمیان مزید خونریزی اور انسانی جانوں کے ضیاع کو روکنے کے لیے زیادہ سے زیادہ تحمل کا مظاہرہ کیا جانا چاہیے۔

انہوں نے کہا کہ صورتحال فوری جنگ بندی کا مطالبہ کرتی ہے کیونکہ فلسطین اور اسرائیل کے درمیان تشدد اور تصادم سے عوام کی مشکلات میں مزید اضافہ ہوگا۔

صدر مملکت نے بین الاقوامی برادری پر زور دیتے ہوئے کہا کہ وہ فریقین کو لڑائی مزید بڑھنے سے روکنے کیلئے اپنا فعال کردار ادا کرے۔

عارف علوی نے مزید کہا کہ بین الاقوامی برادری اقوام متحدہ کی متعلقہ قراردادوں اور بین الاقوامی قانون کے مطابق دیرینہ تنازعہ کے پرامن حل کیلئے کام کرے، 70 سال میں بہت ظلم ہو چکا ہے۔

اس سے قبل نگران وزیراعظم انوار الحق کاکڑ نے حماس کے اسرائیل پر راکٹ حملوں پر ردعمل دیتے ہوئے کہا تھا کہ فلسطین کے مسئلہ کو فوری حل کرنے کی ضرورت ہے، مشرق وسطیٰ میں بڑھتے ہوئے تشدد سے دل افسردہ ہے، ہم شہریوں کے تحفظ پر زور دیتے ہیں۔

نگران وزیراعظم نے مزید کہا تھا کہ مشرق وسطیٰ میں پائیدار امن دو ریاستوں کے حل میں مضمر ہے، جس میں ایک خود مختار ریاست فلسطین ہے جس کے دل میں القدس شریف ہے۔

دوسری جانب ترجمان دفتر خارجہ نے فلسطین و اسرائیل کشیدگی پر ردعمل دیتے ہوئے کہا تھا کہ مشرق وسطیٰ کی ابھرتی ہوئی صوتحال پر پاکستان کو تشویش ہے، فلسطین اور اسرائیل کے درمیان کشیدگی پر گہری نظر ہے۔

ترجمان کا کہنا تھا کہ پاکستان کو قیمتی جانوں کے ضیاع پر تشویش ہے، پاکستان بین الاقوامی قانون، اقوام متحدہ  اور او آئی سی کے مطابق مسئلہ فلسطین کو حل کرنے کا خواہ ہے، مسئلہ فلسطین کے حل کے  ساتھ ہی مشرق وسطیٰ کا امن جڑا ہے۔

دفتر خارجہ کی ترجمان نے مزید کہا تھا کہ 1967 سے پہلے کی سرحدوں کی بنیاد پر ایک خود مختار اور آزاد ریاست قائم کی جائے جس کا درالحکومت القدس شریف ہو، شہریوں کے تحفظ اور مشرقی وسطیٰ میں دیرپا امن کے لئے عالمی برداری اپنا کردار ادا کرے۔

خیال رہے کہ حماس کی جانب سے اسرائیل پر 5 ہزار سے زائد راکٹ فائر کیے گئے ہیں جن میں متعدد اسرائیلی ہلاک اور سیکڑوں زخمی ہوگئے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں