امیر جماعت اسلامی سراج الحق نے کہا ہے کہ عالمی برادری، اقوام متحدہ تماشائی بننے کی بجائے فلسطینیوں کو ان کا جائز اور قانونی حق دلائے۔

تفصیلات کے مطابق امیر جماعت اسلامی سراج الحق نے مسلم لیگ (ن) کے رہنما راجہ ظفر الحق سے گفتگو کرتے ہوئے کہا کہ اسرائیل جنگی جرائم میں ملوث ہے، نہتے اور معصوم فلسطینیوں کا قتل عام اور غزہ پر کیمیکل ہتھیاروں سے حملے کیے جا رہے ہیں، عالمی برادری، اقوام متحدہ تماشائی بننے کی بجائے فلسطینیوں کو ان کا جائز اور قانونی حق دلائے۔

سراج الحق نے کہا کہ اہل فلسطین پر ظلم و جبر کی تاریخ آج سے نہیں 1948ء سے شروع ہوتی ہے، یہ قربانیوں کی عظیم جدوجہد ہے، اسلامی دنیا کے حکمران اتحاد کا مظاہرہ کریں تو مسجد اقصیٰ اور فلسطین آزاد ہو سکتے ہیں۔

 امیر جماعت اسلامی نے غزہ فنڈ کے قیام کا اعلان کیا اور پاکستانیوں سے اپیل کی کہ وہ اس میں بڑھ چڑھ کر عطیات دیں۔

جماعت اسلامی کے کارکنان مساجد، بازاروں اور گلی کوچوں میں کیمپ لگائیں گے اور مظلوموں کی امداد کے لیے عطیات اکٹھے کیے جائیں گے۔

سراج الحق نے کہا کہ پونے 2 ارب مسلمان غزہ میں ظلم و جبر دیکھ کر بے چین ہیں، اسلامی ممالک کے حکمران امت کے جذبات کی پوری طرح ترجمانی کریں، عالمی برادری فلسطینیوں کو انصاف دلانے کے لیے منصفانہ کردار ادا کرے۔

 انہوں نے کہا کہ جماعت اسلامی کی (آج) منگل کو اسلام آباد میں ہونے والی ”قومی فلسطین کانفرنس“ پوری قوم کے جذبات کی عکاسی کرے گی۔

امیر جماعت اسلامی سراج الحق نے مزید کہا کہ عالم اسلام اسرائیلی مصنوعات کے بائیکاٹ کا اعلان کرے۔

واضح رہے کہ اسرائیل اور فلسطین کی مزاحمتی تحریک ’حماس‘ کے درمیان جاری کشیدگی کے بعد اسرائیل کی جانب سے غزہ پر مسلسل بمباری کی جا رہی ہے اور اب تک 2500 سے زیاددہ فلسطینی شہید ہو چکے ہیں۔

اسرائیل کی جانب سے نقل مکانے کرنے والے فلسطینیوں کو بھی نشانہ بنایا جا رہا ہے۔

اسرائیل نے فلسطین کے عوام کو غزہ خالی کرنے کی دھمکی دی ہے مگر حماس نے جواباً کہا ہے کہ اگر زمینی حملہ کرنے کی کوشش کی گئی تو اسرائیلی فوج کو نیست و نابود کر دیں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں