نگران وزیر اعظم انوار الحق کاکڑ 4 روزہ دورے پر چین میں موجود ہیں، تاہم انوار الحق کاکڑ آج بیجنگ میں مصروف دن گزاریں گے۔

تفصیلات کے مطابق نگران وزیر اعظم چین کے تھنک ٹینکس اور اسکالرز کے وفد سے ملاقات کریں گے۔

نگران وزیرِ اعظم روس کے صدر ولادیمیر پیوٹن، کینیا کے صدر ولیم روٹو اور سری لنکا کے صدر رانیل وکرما سنگھے سے بھی ملاقات کریں گے۔

بعد ازاں نگران وزیر اعظم چینی صدر شی جن پنگ کی خصوصی دعوت پر تیسرے بیلٹ اینڈ روڈ فورم میں شریک عالمی رہنماؤں کے اعزاز میں دیئے گئے عشائیے میں بھی شرکت کریں گے۔

گزشتہ روز دورہ چین سے قبل نگران وزیر اعظم انوار الحق کاکڑ نے بین الاقوامی جریدے میں شائع ہونے والے ایک مضمون میں کہا تھا کہ چین پاکستان تعلقات بھائی چارے، دوستی اور اعتماد پر قائم ہے، پاک چین تعلقات کی بنیاد 70 سال پہلے وژن اور ٹھوس بنیاد پر رکھی گئی تھی، چین پاکستان کا بہترین دوست ہے۔

انہوں نے کہا تھا کہ مسحور کن بات ہے کہ چین میں آئرن برادر کی اصطلاح صرف پاکستان کے لیے مخصوص ہے، یقیناً پاک چین تعلقات قدیم تہذیبی رشتوں کا تسلسل ہیں۔

نگران وزیراعظم کا کہنا تھا کہ پاکستان بی آر آئی میں شامل ہونے والے پہلے ممالک میں شامل تھا، چین پاکستان اقتصادی راہداری دو طرفہ ایک سنگ میل کی حیثیت رکھتی ہے۔

انوار الحق کاکڑ نے مزید کہا تھا کہ مجھے یقین ہے پاک چین دوستی مزید مضبوط اور آنے والے سالوں میں مزید بلندیوں کو حاصل کرے گی۔

پاک چین دوستی کے ثمرات

پاکستان اور چین ہمیشہ ہر اچھے اور بڑے وقت میں ایک دوسرے کے شانہ بشانہ کھڑے رہے ہیں، پاکستان کی ترقی میں چین نے ہمیشہ اہم کردار ادا کیا ہے۔

11 اکتوبر کو چینی چینل سی جی ٹی این نے پاک چین دوستی پر خصوصی دستاویزی فلم نشر کی، جس میں پاکستان اور چین کے مشترکہ ترقیاتی منصوبوں پر معلومات فراہم کی گئیں۔

فلم میں دکھائے جانے والے منصوبے پاک چین دوستی کے منہ بولتے ثبوت ہیں۔ پاکستان میں ہر شہری ایک سال میں 1.5 کلو چائے پتی استعمال کرتا ہے اور ہمارے ملک میں ضرورت تھی کہ ہم چائے پتی کی پیداوار اپنے ملک میں ہی کریں، چین نے پاکستان میں چائے پتی کی پیداوار کے لیے موزوں زمین کی نشاندہی میں مدد کی۔

پاکستان میں تھری گورجس ساؤتھ ایشین انویسٹمنٹ لمیٹڈ اور سازگار انجینیئرنگ جیسی انڈسٹری بھی پاک چین مشترکہ کامیاب منصوبوں کی بہترین مثال ہے، پاکستان میں چین کی مدد سے 720 میگاواٹ صاف اور گرین بجلی کی پیداوار کی جارہی ہے۔

پاکستان سے ہر سال بےشمار طلبہ و طالبات چین کی جانب سے مہیا کردہ سکالرشپ پروگرام کے تحت اعلیٰ تعلیم حاصل کرنے چائنہ جاتے ہیں، چین کے تعاون سے پاکستان ایسے ہی ترقی کی راہ پر گامزن رہنے کا عزم رکھتا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں