خیبرپختونخوا کے گورنر حاجی غلام علی نے کہا ہے کہ دنیا میں امن قائم رکھنا بڑے ممالک کی ذمہ داری ہے۔

تفصیلات کے مطابق خیبرپختونخوا کے گورنر حاجی غلام علی نے بول نیوز سے خصوصی گفتگو کرتے ہوئے کہا کہ اسرائیل نے فلسطین میں مظالم اور بربریت کی انتہا کر دی، پاکستانی حکومت اور عسکری قیادت نے فلسطینیوں کے ساتھ مکمل یکجہتی کا اظہار کیا ہے۔

غلام علی نے کہا کہ پاکستان فلسطینیوں کی سیاسی سفارتی اور اخلاقی مدد جاری رکھے گا، فلسطین کے مسئلے پر پاکستانی عوام حکومت اور تمام سیاسی جماعتیں ایک پیج پر ہیں۔

ان کا کہنا تھا کہ فلسطین سے جلد مظالم مٹ جائیں گے، دنیا میں امن قائم رکھنا بڑے ممالک کی ذمہ داری ہے، ساری سپر پاورز امن قائم رکھنے کے لیے اپنا کردار ادا کریں، امت مسلمہ اقوام متحدہ اور اقوام عالم سے مطالبہ ہے کہ فلسطین کے مسئلے کا حل نکالیں۔

فلسطین اسرائیل جنگ، شہید فلسطینیوں کی تعداد 4 ہزار سے تجاوز کرگئی

غزہ پر اسرائیلی بمباری میں 1500 سے زائد بچوں سمیت 4 ہزار سے زائد فلسطینی شہید ہوگئے۔

بین الاقوامی خبر رساں ادارے کے مطابق  غزہ پر اسرائیل کی وحشیانہ بمباری جاری ہے جس میں 1524 بچوں سمیت 4137 فلسطینی شہید ہوگئے جبکہ   زخمیوں کی تعداد 13 ہزار سے تجاوز کر گئی ہے۔

اسرائیل نے غزہ اور مغربی کنارے کے رہائشی علاقوں اور مذہبی مقامات پر وحشیانہ بمباری کا سلسلہ جاری رکھا ہوا ہے۔

اسرائیلی بمباری میں اسپتالوں اور ایک چرچ کے بعد اب ایک تاریخی مسجد العمری الکبیر کو بھی نشانہ بنایا گیا ہے جس  کے نتیجے میں مسجد شہید ہوگئی۔

منگل کی شب غزہ کے ایک اسپتال پر اسرائیلی فوج کی بمباری میں 500 سے زائد فلسطینی شہید اور سیکڑوں زخمی ہوگئے تھے۔

اسرائیلی طیاروں نے اسپتال کو  نشانہ بنایا  تھاجس میں طبی عملہ، مریض اور  پناہ لیے ہوئے عام شہری شہید ہوئے تھے۔